«Almaty» voleıbol klýby áıelder arasynda el kýbogynyń jartylaı fınalynda baq synaýǵa múmkindik aldy
ALMATY. Qazannyń 28-i. QazAqparat /Erlik Erjanuly/ - Keshe Almatyda voleıboldan áıelder komandalary arasyndaǵy Qazaqstan kýbogynyń shırek fınaldyq oıyndary aıaqtaldy,
dep habarlaıdy QazAqparat.
Qazannyń 20-sy kúni Oktıabr Jarylǵapov atyndaǵy sport kesheninde jalaýyn kótergen bul jarysqa 8 komanda qatysqan bolatyn. Birde-bir upaı joǵaltpaǵan Almaty oblysynyń «Jetisý» komandasy 14 upaı jınap birinshi oryn aldy. Olardan 1 upaı kem jınaǵan almatylyqtar ekinshi, 12 upaımen «Ertis» (Pavlodar) úshinshi jáne 11 upaımen «Astana» (Astana) tórtinshi oryn aldy. Endi qazannyń 31-i men qarashanyń 1-i aralyǵynda «Temir dos» sport kesheninde el kýbogynyń jartylaı jáne aqtyq fınaldyq oıyndary ótedi. Onda aldymen «Jetisý» men «Astana», «Almaty» men «Ertis» voleıbolshylary kúsh synasady. Bul saıystyń jeńimpazdary odan keıin ózara Qazaqstan kýbogyn sarapqa salatyn bolady.
