Almaty vokzaldarynda órt qaýipsizdigi qalaı saqtalady
ALMATY. QazAqparat - Almatyda Qoǵamdyq keńes otyrysynda qala vokzaldaryndaǵy órt qaýipsizdigin qamtamasyz etý máselesi talqylandy, dep habarlaıdy QazAqparat tilshisi.
«QTJ» AQ UK vokzal sharýashylyǵy boıynsha atqarýshy dırektory Juban Kórpebaevtyń aıtýynsha, eldegi barlyq vokzaldarda revızııa jumystary júrip jatyr.
«Qańtarda jospardan tys tekserý boldy. «Almaty-1» jáne «Almaty-2» vokzaldarynda órt qaýipsizdigi dabylyn júrgizý boıynsha kelisim sharttyń joqtyǵy anyqtaldy. Qazir bul eskertpeler tolyǵymen ornyna keltirildi. Qazir biz evakýatsııalyq joldardy tekserip jatyrmyz. Jaqynda kútý zaldarynda áleýmettik rolık kórsetiletin bolady. Onda adamdar tótenshe jaǵdaı bola qalǵan kezde ne isteý kerektigin kórip otyratyn bolady. Vıdeoda ǵımarattyń evakýatsııalyq shyǵý joldary aıqyn kórsetiledi», - dedi Juban Kórpebaev.
Mamandardyń aıtýynsha, vokzaldarda órt qaýipsizdigimen qatar terrorızmge qarsy qaýipsizdik sharalary saqtalýy tıis.
«Ár vokzalda antıterrorıstik qaýipsizdik maqsatynda aldyn ala tekserý quraldaryn ornatý shemasy belgilendi. Bul jumystar qalalyq ІІD, prokýratýramen birlese jasaldy. Sol shemaǵa sáıkes, qaı esikter únemi ashyq bolýy tıistigi kórsetilgen. Al, basqa esikter magnıttik karta boıynsha ashylýy tıis. Tótenshe jaǵdaı bola qalǵan kezde kezekshi dıspetcher 1 ǵana tetikti basý arqyly esikterdiń báriniń ashylýyn qamtamasyz etýi tıis. 12 sáýirde osy avtomattyq júıe tolyǵymen iske qosylady», - dedi Juban Kórpebaev.
foto:controleng.ru
