Almaty velotýry bolashaqta dástúrli túrde jyl saıyn ótýi múmkin
ALMATY. 6 qazan. QazAqparat - Almatydaǵy kásipqoı veloshabandozdardyń «Almaty velotýry» aldaǵy jyldan bastap kópkúndikke aınalýy múmkin. Ony jarystyń bas demeýshisi «Astana toby» kompanııasynyń prezıdenti Nurlan Smaǵulov búgin «Almaty velotýry» kezinde aıtty.
«Buǵan deıin kásipqoı sportshylardyń mundaı jarysy óz elimizde ótedi dep eshqashan oılamaǵan edim. Búgin erekshe qýanyshtymyn. Buǵan deıin kásipqoı velosıpedshilerdiń ártúrli elderde ótken jarystaryna baryp tamashalaǵan edim. Bul jarysqa qatysyp jatqan kásipqoı shabandozdar arasynda kóptegen dostarym bar», - deıdi N.Smaǵulov.
Onyń aıtýynsha, kelesi jyly bul jarys 2 kúnge sozylyp, sportshylar toptyq jáne jekeleı synǵa túsýge múmkindik alýy múmkin. Bul Almaty-Astana nemese Almaty- Taldyqorǵan qalalary arasynda ótip, tipti birneshe kúnge deıin sozylyp jatsa, nur ustine nur bolar edi. Ázirge munyń bári arman, degenmen UCI uıymy oń sheshim qabyldaıdy degen úmit bar.
