«Almaty» velotýry bıyl jańa deńgeıge kóterildi

Dástúrli besinshi halyqaralyq kásibı velojarys «Almaty týry» bıyl qyrkúıektiń 30-y men qazannyń 1-i kúnderi ótedi.

Erekshe aıta keterligi, bıyl Halyqaralyq velosıpedshiler odaǵy (UCI) reglamentine sáıkes, kópkúndik «Tasjoldaǵy velojarys» dárejesine ıe boldy.

Jalpy, «Almaty týry» 2013 jyly alǵash ret uıymdastyrylǵan bolatyn. Ol kezde birkúndik týr «1.2» sanaty boıynsha ótkendikten, kásibı komandalar qatysa almaǵan. Alaıda, endi, UCI kelisimimen «Almaty týry» «1.1» kásibı velojarys mártebesin ıelenip, qatysýshylar sanyn arttyryp otyr.

«Tórt jyl boıy biz qala ákimdiginiń, Almaty qalasy sport basqarmasynyń qoldaýymen «Almaty týryn» uıymdastyrý úshin biraz kúsh saldyq. Biz birlese otyryp, sapaly, halyqaralyq sport jobasyn iske qostyq. Ótken jylǵy velojarys joǵary deńgeıde ótti. Biz shara aýqymyn, uıymdastyrý jaǵyn keńeıtip, týrdy jańa deńgeıge kóterdik. Meniń oıymsha, dál osy besinshi mereıtoılyq jarystyń jańa deńgeıge kóterilgeni jaqsy yrym. Almaty - velosporty qarqyndy damyǵan qala, sondyqtan, alyp shahar úshin bul sport dodasy mańyzdy dep senimen», - dedi Qazaqstan velosport federatsııasynyń vıtse-prezıdenti Amanbek Qulshyqov.

Sonymen qatar, onyń aıtýynsha, birkúndik halyqaralyq jarystyń mártebesin kóterý ońaı emes, mundaı úderis birshama ýaqytty qajet etedi, ony qarastyrý birneshe nemese ondaǵan jyldarǵa sozylýy múmkin.

Amanbek Qulshyqovtyń aıtýynsha, UCI  Almaty týryn joǵary baǵalady.

«Almaty týry-2017» eki kezeńde ótedi. Eger, buǵan deıin halyqaralyq velojarys «krıterıým» formatynda ótken, ıaǵnı, qatysýshylar qaı jerden bastasa, sol jerden aıaqtaıtyn. Al bıyl velosıpedshiler «sóreden» «márege» deıingi qashyqtyqty, qala, taýly joldarmen júrip ótedi. Dodanyń basym bóligi tegis asfalttalǵan Almaty kóshelerinde ótedi. Al jarystyń sońǵy máresi taýly aımaq - «Medeý» muzaıdynynda bolmaq. «Almaty týrynyń» birinshi kezeńi QBTÝ ǵımaratynan bastalady. Qatysýshylar Tóle bı, Fýrmanov, Sátpaev, Baızaqov, Abaı jáne Jeltoqsan kóshelerinen «qaladaǵy aınalys» mejesin júrip ótip, «Almaty Arena» mańynda márege jetedi. Ekinshi kezeńde sportshylar «Halyq Arena» ǵımaratynan bastap, «Shyǵys aınalma jol - Ál-Farabı, Tuńǵysh Prezıdent saıabaǵy janymen júredi. Al «Medeýde» velojarys aıaqtalady.

UCI reglamentine sáıkes, halyqaralyq kásibı tasjoldaǵy velojarysqa kásibı komandalar, qurlyqtyq,  qurlyq aralyq komandalar, sondaı-aq, ulttyq qurama komandalary qatysa alady.

Qazaqstandyq kásibı komanda «Astana Pro Team» dástúr boıynsha «Almaty týrǵa» qatysady. Qatysýshylardyń tolyq tizimi keıinirek belgili bolady.

Aıtýly doda Eurosport telearnasynda kórsetiledi.

«Almaty týrdyń» saltanatty jabylý rásimi «Medeý» sporttyq kesheninde ótedi.