Almaty - Úrimshi avıabaǵyty «Eır Astana» kompanııasy úshin bolashaǵy zor jańa naryqty ashady - Pıter Foster
ALMATY. Maýsymnyń 23-i. QazAqparat /Erbol Turymbetov/ - Bıylǵy jyldyń 2-shi shildesinen bastap «Eır Astana» ulttyq avıatasymaldaýshy kompanııasy Almaty - Úrimshi baǵyty boıynsha aıaldamasyz jańa áýesaparyn ashady. Ony kompanııanyń prezıdenti Pıter Foster búgin Almatyda ótken baspasóz máslıhatynda aıtty,
dep habarlaıdy QazAqparat.
Bul baǵyttaǵy ushýlardy «Eırbas A320» áýe kemesi aptasyna úsh ret sársenbi, juma jáne jeksenbi kúnderi júzege asyrady. Al Úrimshiden Almatyǵa qaraı ushý beısenbi, senbi jáne dúıesenbi kúnderi júrgiziledi.
«Búginge deıin «Eır Astana» áýe kompanııasy Almaty - Beıjiń jáne Astana - Úrimshi baǵyttary boıynsha ushýlardy júzege asyryp keledi. Alaıda, atalǵan tasymaldaýlar qazirgi tańdaǵy suranysty qamtamasyz etýge jetkiliksiz. Máselen, osyǵan deıingi áýe qatynastaryn júzege asyrý kezinde 340 myń 985 jolaýshy men 6093.8 tonna júktiń tasymaldanýy eki el arasyndaǵy áýeqatynasqa degen qajettiliktiń joǵarylyǵyn aıǵaqtaıdy. Almaty - Úrimshi baǵyty boıynsha áýeqatynas «Eır Astana» avıakompanııasy úshin bolashaǵy zor jańa naryqty ashady», dedi «Eır Astana» AQ prezıdenti Pıter Foster.
2002 jyldyń 3-shi jeltoqsanynda Qazaqstannyń ulttyq áýetasymaldaýshysy Almaty men Beıjińdi alǵashqy ret áýeqatynasymen baılanystyrdy. Al Astana - Úrimshi baǵytynda ushý 2008 jyldyń 15-shi qarashasynan bastaldy. 2009 jyly kompanııanyń Astana - Úrimshi - Astana baǵyty boıynsha usynatyn qyzmetin 15037 adam paıdalanǵan edi. Al júk tasymaly osy kezeńde 50%-dy quraǵan bolatyn. Kompanııa ókilderiniń aıtýynsha, bıyl qańtar-mamyr aılary aralyǵynyń ózinde jolaýshylar sany kórsetkishi 8457 adamǵa jetip, ortasha júkteme 68%-ǵa deıin artyp otyr.
