«Almaty Ýnıversıada astanasy atandy!» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, keshe keshqurym Aqordanyń aldyndaǵy alańda Memleket basshysy Nursultan Nazarbaevtyń qatysýymen elimizdiń Bas jańajyldyq shyrshasyn jaǵý rásimi ótti. Bas shyrshanyń san alýan shamdary jarqyraı janyp, ony qyzyqtaýǵa úsh myńǵa jýyq bala men eresek jınaldy. «Bıylǵy jyl - elimiz úshin erekshe jyl. Ol el Táýelsizdiginiń 20 jyldyǵyn merekeleý qarsańynda ótip otyr. Bul - bárimiz úshin aıtýly mereıtoı. Jańajyldyq mereke - bul ertegideı kórinetin, armandary oryndalatyn, bolashaqqa jospar quratyn árqashan balalardyń merekesi. Biz sender úshin eńbek ettik, senderdiń baqytty bolýlaryń úshin jumys istedik. Senderdiń mindetteriń - jaqsy oqý, bizdiń uly Otanymyzdyń laıyqty azamaty bolý. Biz jıyrma jyldyqty merekeleımiz, tabystardy atap ótemiz. Bolashaqqa jospar quramyz. Al, bizdiń bolashaǵymyz - sendersińder. Senderge, bizdiń balalarymyzǵa men jańa jylda mol baqyt, myqty densaýlyq tileımin. Bizdiń elimiz gúldene bersin, bizdiń balalarymyz baqytty bolsyn», - dep atap ótti rásim barysynda Memleket basshysy.
«Keshki qalalyq gazetterde bolmasa, tańerteń jaryq kóretin kúndelikti basylymdarda «búgin...» dep sóıleý salty qabyldanbaǵan. Óıtkeni, tańerteńgilik gazetter ádette eń jedel degende keshegi kúnniń keshki oqıǵalary jaıynda jazady. Al bul joly biz búgin, ıaǵnı 30 qarashada jetken habardy jarııalaǵaly otyrmyz. Túngi saǵat 1-ge jaqyn qalǵanda, «Egemen Qazaqstannyń» betterine qol qoıylǵaly jatqan shaqta Belgııa astanasy Brıýsselden súıinshi habar aldyq», - dep jazady basylym «Almaty Ýnıversıada astanasy atandy!» degen taqyryptaǵy súıinshi maqalasynda. Basylymnyń jazýynsha, mańyzy men aýqymy jóninen Olımpıadalyq oıyndardan keıingi ekinshi orynda turatyn bul jahandyq jarysty ótkizýge talasýshylardyń sońǵy máresine eki qala shyqqan edi. Onyń biri Almaty, ekinshisi Italııanyń Trento qalasy bolatyn. Keshe Almatynyń anyq artyqshylyǵyna jáne eldegi ekonomıkalyq daǵdarysqa baılanysty Italııa úkimeti Ýnıversıadaǵa Trento kandıdatýrasyn alyp tastaý jóninde sheshim qabyldaǵany habarlandy. Sondyqtan Almatynyń 2017 jylǵy Ýnıversıada astanasy atanýy avtomatty túrde júzege asty.
***
«Aıqyn» gazetiniń jazýynsha, «Eýrazııalyq yqpaldastyq ıdeıasy qanshalyqty ulttyq múddege jaýap beredi?» degen máselege turaqty monıtorıng júrgizý qajet! Osyndaı usynysty keshe Astanada Táýelsizdiktiń 20 jyldyǵy aıasynda ótken Qazaqstan saıasattanýshylarynyń kongresinde Prezıdent Ákimshiligi basshysynyń orynbasary Baǵlan Maılybaev jasady. «Saıasattyń «tamyr soǵysyn» qadaǵalap otyratyn sarapshylardyń bul quryltaıy Eýrazııalyq ıntegratsııa máselesine arnalypty. Jıynǵa Senat depýtattary, sondaı-aq ortalyq memorgandardyń, ǵylymı-zertteý mekemeleriniń ókilderi, sheteldik sarapshylar qatysty», - dep jazady basylym. Maqala «El nazarynda - Eýrazııalyq ıdeıa» degen taqyryppen berilgen.
Jastar aldaǵy Májilis saılaýyna óz únderin qosyp, saıası belsendiligin arttyrýdy kózdep otyr. Keshe bir top belsendi jastar «Frıdom Qazaqstan» ortaq koalıtsııasyna birigip, saılaý kezinde daýys berý barysyna halyqtyq baqylaý ornatýdy usyndy. Bul jaıynda «Aıqyn» gazetiniń sársenbilik sanynda jarııalanǵan «Jastar únsiz qalǵysy kelmeıdi» degen taqyryptaǵy maqalada keńinen baıandalǵan. «Frıdom Qazaqstan» koalıtsııasyna azamattyq qoǵamnyń tetigi sanalar úkimettik emes uıymdar men joǵary oqý oryndarynyń stýdentteri kirmek. Koalıtsııanyń kózdegeni - saılaý barysynda «Saılaý týraly» zańnyń buzylmaýyn qadaǵalap, kemshilikter men qatelikter haqynda halyqty habardar etý.
***
«Keshegi Úkimet otyrysynyń negizgi jańalyǵy - Elbasy Nursultan Nazarbaevqa Halyq Qaharmany ataǵyn berý týraly Premer-Mınıstr Kárim Másimovtiń usynysy boldy. Táýelsizdigimizdiń 20 jyldyq mereıtoıy qarsańynda Prezıdentke tosyn syı jasaǵysy kelgen Premerdiń osy sıpattaǵy asa mańyzdy qujatqa ómirinde birinshi ret qol qoıýy eken», - dep jazady «Alash aınasy» búgingi sanyndaǵy «Elbasy Halyq Qaharmany ataǵyna usynyldy» degen maqalasynda. Sondaı-aq budan basqa Úkimette qaralǵan máselelerdiń egjeı-tegjeıin bilgińiz kelse, basylymnyń búgingi sanyn jiberip almańyz.
Osy basylymnyń turaqty «Dat!» aıdarynda tehnıka ǵylymynyń doktory, professor Jumajan Jańbyrovpen aradaǵy suhbat «Elbasy ǵylymı ataq berýdi teginnen-tegin synǵa alyp júrgen joq» degen taqyryppen berilgen. Tilshiniń barlyq saýaldaryna tuşymdy jaýap bergen ol: «Bizde jer baılyǵy bar, halyq bar, Elbasymyz bar, bilim bar - bári bar. Tek iri kompanııalardyń basshylyǵynda otyrǵandarda ulttyq sezim, ulttyq namys azdaý ma deımin. Qarapaıym mysal, olarda patrıottyq sezim, janashý bolmaǵandyqtan, elimizde jóndi janarmaı shyǵara almaı otyrmyz», - deıdi.
***
«Keshe Memleket basshysy Nursultan Nazarbaev shahmattan álem chempıonatynda altyn medaldi jeńip alǵan jas qazaqstandyq shahmatshy Jansaıa Ábdimálikke quttyqtaý jedelhatyn joldady», - dep jazady «Kazahstanskaıa pravda» gazeti.
«Seni Brazılııadaǵy álemdik shahmat týrnırindegi jarqyn jeńisińmen quttyqtaımyn! Sen joǵary deńgeıde oıyn órnegin kórsetip, altyn medal ıelene otyryp, tórt márte álem chempıony atandyń. Bul seniń talantyńnyń, eńbegiń men jeńiske degen erik-jigerińniń nátıjesi. Seniń orasan tabysyń Qazaqstan Táýelsizdiginiń 20 jyldyǵyna erekshe syılyq boldy. Seniń jetistigiń jas qazaqstandyqtar úshin úlken úlgi-ónege bolatynyna senemin», - delingen quttyqtaý jedelhatynda.
