Almaty əýejaıynyń basshylyǵy ondaǵy saýda baǵasyna yqpal ete almaı otyr
ALMATY. QazAqparat - Almaty áýejaıynyń basshylyǵy áýejaı aýmaǵynda ornalasqan saýda oryndaryndaǵy taýar baǵasyna yqpal ete almaıdy, dep habarlaıdy QazAqparat tilshisi.
«Bul másele sonaý 90-shy jyldary paıda bolǵan. Sol kezde Almaty áýejaıyndaǵy saýda oryndary jeke uıymdarǵa satylyp ketken. Sondyqtan, ol oryndardaǵy baǵaǵa eshqandaı da yqpalymyz joq. Biz bul oryndardy ózimizge qaıta satyp alǵymyz keldi, biraq ıeleri óte qymbat baǵa aıtty. Men bizdiń áýejaıdaǵy azyq-túlik baǵasyn TMD elderindegi áýejaıdaǵy baǵalarmen salystyrdym. Mysaly, Máskeýdegi Domodedovo áýejaıyndaǵy bir bótelke sý Almaty áýejaıyndaǵy sýdan arzan emes», - dedi «Almaty Halyqaralyq áýejaıy» AQ Prezıdenti Aıbol Bekmuhambetov.
Bul máselege qatysty Almaty ákimdigi janyndaǵy Qoǵamdyq keńes músheleri pikir bildirdi.
«Termınaldar ornalasqan aýmaqta báseke jaǵdaıyn týǵyzatyndaı jańa saýda núktesin ashý múmkin emes. Degenmen, Qoǵamdyq keńes músheleri saýda oryndarynyń ıelerimen kelissózder ótkizip, 1-shi qabattan bıýdjettik ashana ashýǵa qol jetkizdi. Bul salada jumystar júrip jatyr, biraq qalaı bolǵanda da sońǵy sózdi saýda oryndarynyń qojaıyny aıtady», - deıdi QK múshesi Denıs Krıvosheev.
Sonymen qatar, bul kezdesýde áýejaı basshylyǵy áýejaıdaǵy qyzmet sapasy týraly keńirek tarqatyp aıtyp berdi.
«Qazirgi ýaqytta áýejaı qyzmeti bılet qunynyń 11-14 paıyzynan aspaıdy. Halyqaralyq áýe reısterinen 1 900 teńge jınalatyn bolsa, ishki reıster 406 teńgeden tóleıdi. Bul qarjy ushyp, qoný termınaldaryna qyzmet kórsetýge, elektrjaryǵyna, navıgatsııa qyzmetine jumsalady. Qazirgi ýaqytta Almaty áýejaıy qýattynyń 30 paıyzyn ǵana jumsap otyr. Máselen, jylyna Almaty áýejaıy 14 mln jolaýshyǵa qyzmet kórsetýge qabiletti bolsa, 2016 jyly 4,8 mln jolaýshyǵa qyzmet kórsetilgen nemese táýligine 160 ushaq kelip, attandyrylǵan. Boljam boıynsha, 2017 jyly Almaty áýejaıynan 5,5 mln jolaýshy saparlaıdy dep oılaımyz. Biz keńeıtýge, qosymsha termınal salýǵa daıynbyz. Biraq, biz qazir Almaty shetinen jańa áýejaı salý týraly usynystyń birjaqty sheshilýin kútip otyrmyz. Eger ol salynsa, onda qazirgi áýejaıdy keńeıtýdiń qajeti joq bolady», - dedi áýejaıdyń birinshi vıtse-prezıdenti Qoblandy Tumyshev.
Aıta keteıik, Almaty halyqaralyq áýejaıy reısterge qyzmet kórsetý jaǵynan TMD elderi ishinde eń úzdik áýejaılardyń biri. Áýejaı balansynda barlyq reısterge qyzmet kórsetetin 386 tehnıka bar. Almaty áýejaıy qar tazalanbaǵannyń kesirinen reısterdi eshqashan toqtatqan emes. Reıster aýa raıynyń qolaısyzdyǵyna, qalyń tumanǵa baılanysty ǵana toqtap, ıa keshigip ushqan.
