Almaty TJD órtengen úıden balalardy qutqarǵan qańǵybas týraly aqparatty joqqa shyǵardy
ALMATY. QazAqparat - Almaty TJD órtengen úıden balalardy qutqarǵan qańǵybas týraly aqparatty joqqa shyǵardy, dep habarlaıdy QazAqparat tilshisi.
Qalalyq TJD baspasóz hatshysy Sandýǵash Baımuhambetovanyń aıtýynsha, Muqanov kóshesindegi №152 barak tıptes úıde 6 otbasy turady.
Órt bolǵan kezde otbasy músheleri túgel úıde bolǵan.
«Bul úıde jas shamasy 10 aıdan 14 jas aralyǵyndaǵy 14 bala turady eken. Órt kúsheıgen kezde ata-analary ózderi balalardy syrtqa shyǵaryp, odan keıin «Bógenbaı batyr, 218» mekenjaıyndaǵy kórshilerine aparǵan. Turǵyndar arasynda júrgizilgen saýalnama kórsetkendeı, olar eshqandaı qańǵybas adamdy kórmegen», - dedi Sandýǵash Baımuhambetova.
Aıta ketý kerek, tótenshe oqıǵa 18 qarasha kúni Almaly aýdanynda bolǵan.
Órt týraly habarlama «101» nómirine tańǵy 10:09-da «Muqanov kóshesi, 152» mekenjaıynda ornalasqan jer úıdiń órtenip jatqany týraly habarlama túsken.
Tilsiz jaý shamamen 300 sharshy metr aýmaqty sharpydy. Onymen kúres barysynda saltanatty sharalar men merekelerdi uıymdastyrýmen aınalysatyn «Shar dızaın» JShS ǵımaratynan 37 gellıı ballony (bos), jer úıden kólemi 27 lıtrlik 4 gaz ballony shyǵaryldy.
Órttiń shyǵý sebebi anyqtalýda. Zardap shekkender joq.
Birqatar BAQ sol kúni 10-nan astam balany turǵylyqty mekenjaıy joq qańǵybas órtten qutqardy dep habarlaǵan bolatyn.
