Almaty TJD Keńsaıdaǵy órtke qatysty turǵyndardyń shaǵymyna jaýap berdi
ALMATY. QazAqparat – Almatyda qalalyq TJD Keńsaı-1 musylman zıraty tusynda qoqys polıgony órtenýine baılanysty turǵyndardyń shaǵymyna jaýap berdi, dep habarlaıdy QazAqparat tilshisi.
Áleýmettik jelide qala turǵyndary 4 kún boıy órttiń sóndirilmegenin aıtyp shaǵymdanǵan bolatyn.
«Keńsaı-1 zıratynyń mańyndaǵy qoqys úıindisi órtenip jatyr. Bul qoqysty zırat jumysshylary úıgen. Tórt kún boıy tútin shyǵyp jatyr. Sársenbaev kóshesinde turatyn turǵyndarǵa tynys alý óte qıyn. Órtti sóndirmeı-aq, qoqysty shyǵarmasa bolmaıdy. Qaladaǵy órte qarsy qyzmetke habarlastyq. Biraq, nátıje joq», - dedi turǵyndar.
https://www.instagram.com/p/CAEqfQCDWYJ/?igshid=eggoss2i3q2c
Áleýmettik jelidegi saýalǵa qalalyq TJD ókilderi jaýap berdi. Olar órt bastalǵan kúnnen bergi jumystardy hronologııalyq tártippen tizip shyqty.
«QR zańnamasyna sáıkes 101 jelisine túsken qońyraýǵa mindetti túrde jaýap beriledi. Departamentke kelip túsken barlyq habarlama boıynsha áreket etedi. 8 mamyrda saǵat 22:30-da 101 nómirine habarlasqan turǵyndar «Keńsaı-1» musylman zıratynyń qasynda órt bastalǵanyn aıtty. Oqıǵa ornyna órt sóndirýshiler jetýi qıyn boldy. Órt sóndirýshiler kelgende aýdany 50 sharshy metr aýmaq órtenip jatqan. Órtti sóndirýge 10 adam, 2 avtotsısterna jumyldyryldy. Órt túngi saǵat 00:22 mınýtta sóndirildi», - dedi TJD baspasóz qyzmetinen.
Departament ókilderiniń aıtýynsha, 9 mamyrda sol jerde tútin shyqpaǵan, sebebi jaýyn jaýǵan bolatyn.
«11 mamyrda 20:31 mınýtta sol aýdannyń turǵyny 101 dıspetcherine «Keńsaı-1» musylman zıratynda órt bastalǵanyn habarlady. Órt sóndirýshiler oqıǵa ornyna jaıaý jetýge májbúr boldy. Belgili bolǵandaı, ol jerde de qoqys órtengen. Aýdany 50 sharshy metr órt túngi saǵat 21:17-de sóndirildi. Bul órtti sóndirýge 6 adam men 1 kólik jumyldyryldy. Al 12 mamyrda saǵat 11:53-te taǵy musylman zıratynda órt shyqqany týraly habarlama túsken. Oqıǵa ornyna barǵanda órt sóndirýshiler órtengen jer shoqtanyp byqsyp jatqanyn kórgen. Tútindegen 30 sharshy metr aýmaq saǵat 12:26-da sóndirildi. Tótenshe jaǵdaıdan eshkim japa shekken joq», - dedi TJD ókilderi.
