Almaty: Tyl ardagerleri І. Janbosynov pen U. Janbosynovanyń shańyraq kótergenine - 61 jyl (FOTO)
ALMATY. QazAqparat - Almatyda Alataý aýdanynda mıýaly báıterek sııaqty tamyryn keńge jaıyp, ul, qyz ósirip kele jatqan Janbosynovtar áýleti búkil aýdan jurtshylyǵyna málim úlgili de syıly otbasy.
78 jastaǵy otaǵasy Іlııas Janbosynov pen Ultaı Janbosynovanyń shańyraq kótergenine bıyl 61 jyl tolady. Jaqyn arada olar gaýhar toıyn atap ótpekshi.
Іlııas qarııanyń balalyq shaǵy soǵys kezimen tuspa-tus kelgen. Jasynan eńbekpen shyńdalyp ósken bozbala 1954 jyly Kegen aýdan ortalyǵyndaǵy kólik-traktor stansasyna traktorshy bolyp ornalasady.
Tehnıka salasynda eńbek ótili - 43 jyl.
Janbosynova Ultaı apa da tyl ardageri, kúmis alqa ıegeri. Ekeýi 8 bala tárbıelep, ulyn - uıaǵa, qyzyn - qııaǵa qondyrǵan abyroıly shańyraq ıeleri atandy.
Olardan 19 nemere, 11 shóbere súıip otyr. Qarııalardyń tuńǵysh shóberesi 6 jasar Mádı qazir mektep tabaldyryǵyn attady.
«Balalarymyzdyń árqaısysy qazir ómirge kirpish bolyp qalanyp, biri-bir salanyń mamany boldy. Eki nemerem Astanada quqyq qorǵaý salasynda jumys isteıdi. Ekeýi Almaty jol polıtsııasynda eńbek etip júr. Bir balam temir jol salasynda, ekinshisi Ulttyq bankte zańger bolyp isteıdi. Qyzdarym otbasynyń tútinin tútetip úıde otyr», - dedi Іlııas qarııa.
Qazir qarttar ósirip-jetkizgen balalarynyń qýanyshyna kýá bolyp, jemisin jep otyr.
Kez-kelgen meıramda, qýanysh-toıda úlken áýlettiń músheleri qara shańyraqqa jınalady. Ár merekeni olar osy úlken úıde ótkizgendi unatady.
«Bılikke aıtar ókpemiz joq. Medıtsınalyq kómek te, basqa da áleýmettik kómek berilip turady. Aqsaqaldar alqasynda múshe edim. Densaýlyǵyma baılanysty shyǵyp qaldym. Sonda da alqaly jınalystarǵa shaqyryp turady. 9 mamyrda da únemi syı-syıapat alyp turamyz», - dedi ata.
Otbasynyń baqyty berek-birlikte,- deıdi qarııa.
«Árdaıym yntymaqta bolý, úlkenniń aldyn qııa kespeý - shańyraqtyń shattyǵyn saqtaýdyń birden bir joly. Táýelsiz Qazaqstanǵa adal eńbek etip, elimizdiń kósegesin kógertińder. Aıtarym osy», - dep túıindedi ata sózin.
