«Almaty týryn» bir kúnnen turatyn ár túrli eki velojarysqa aınaldyrýǵa bolady - A. Vınokýrov
ALMATY. QazAqparat- Halyqaralyq «Almaty týry» bir kúndik velojarysyn ár túrli eki velojarystan turatyn sporttyq sharaǵa aınaldyrýǵa bolady.
Bul týraly búgin Almatyda «Almaty týry-2015» halyqaralyq velojarysy qarsańynda ótkizilgen baspasóz máslıhaty barysynda «Astana Pro Team» velo komandasynyń bas menedjeri, QR velosıped sporty federatsııasynyń vıtse-prezıdenti Aleksandr Vınokýrov málimdedi.
Onyń aıtýynsha, bul upaılyq turǵydan alyp qaraǵanda Qazaqstan qurama komandasyna óte tıimdi.
«Bir kúndik jarysqa qatysqany úshin ulttyq qurama komandalarǵa Halyqaralyq kásipqoı velosport fedratsııasy tarapynan shamamen 40 upaı beriledi. Al kópkúndik jarystarda kerisinshe upaı az. Óıtkeni, olarda kóp upaı alý úshin jalpy esepte jeńiske jetý qajet. Bul ońaı emes. Sondyqtan bizge bir kúnnen turatyn ár túrli eki velojarys mańyzdy. Buǵan asa kóp te shyǵyn ketpeıdi. Sportshylar qonaq úıde ári ketse eki kún ǵana bolady. Onyń ústine kóshelerdi jaýyp, turǵyndarǵa yńǵaısyzdyq týǵyzýdyń da qajeti bolmaıdy. Basqa joldy qarastyrýǵa bolady. Mysaly, Qapshaǵaı qalasynan «Medeý» sport keshenine deıingi aralyqty paıdalanýǵa ábden bolady. Qapshaǵaıdan jarys jolyna shyqqan veloshabandozdar «Medeý» sport kesheni aldynda máre syzyǵynan ótedi. Biz osyndaı jarystardy ótkizýge múddelimiz. Muny aldaǵy ýaqytta Almaty qalasy ákimdigimen birlesip talqylaıtyn bolamyz», - dedi A. Vınokýrov.
