«Almaty týry»: «Eýrosport» velojarysty tikeleı efırden kórsetedi
ALMATY. QazAqparat – Tamyz aıynyń sońǵy kúnderi Almatyda Ortalyq Azııa elderinde tanymal «Almaty týry» velojarysy ótedi, dep habarlaıdy QazAqparat.
Bıyl jetinshi márte uıymdastyrylatyn jarystyń ýaqyty 30 – 31 tamyz kúnderine belgilenip otyr. Buǵan deıin qyrkúıek jáne qazan aılarynda ótkizilip kelgen bolatyn.
«Almaty týrynyń» negizgi baǵyt-baǵdary saqtalady. Degenmen, keıbir jolyna ózgerister engizilmek. Bul joly onyń birshama bóligi asfaltty jerdi qurasa, qalǵany taýly aımaqta ótedi. ıAǵnı, veloshabandozdar «Medeýge» aparatyn joldy baǵyndyryp kóredi.
«Al endi jarystyń ótý merzimine kelsek, bıyl yńǵaıly ýaqytty alyp otyrmyz. Sebebi, bul jarys bastalǵaly beri kúzdiń qara sýyǵynda ótip keldi. Keıinnen kyrkúıekke aýystyryldy. Halyqaralyq veloshabandozdar qaýymdastyǵy (UCI) jarysty ótkizýge qolaısyz ýaqytty berip keldi. Ol kezde kóp jaǵdaıda shabandozdardyń barlyǵy Álem chempıonatyna ketip qalatyn. Bıyl endi tamyz aıynda ótetindikten dodaǵa myqty shabandozdar keledi degen sóz», - deıdi uıymdastyrýshylar.
«UCI «Almaty týryna» kópshiliktiń kóńili túsip, tipti qala ákimdiginiń osy jarysqa kóp nazar bóletinin baıqap otyr. Al biz óz kezegimizde jarysqa tanymal shabandozdardy shaqyryp, dodanyń abyroıyn arttyra berý úshin qyzmet ete bermekpiz», - dedi Qazaqstan velosport federatsııasynyń vıtse-prezıdenti Amanbek Kýlchıkov.
Sonymen qatar, onyń aıtýynsha, alǵashqy kúni jarys qalanyń negizgi dańǵyldarynda jáne kóshelerinde ótedi.
Alǵashqy kezeńi «Indýstrıaldy parkten» bastalyp, «Almaty Arena» janynda márege jetedi. Jalpy uzaqtyǵy - 118 shaqyrym.
Ekinshi kúni shbandozdar qaıtadan ál-Farabı dańǵylyna oralady. Onda olar Shyǵys aınalma joly arqyly 4,5 aınalym júredi de, «Medeý» muz aıdynyna qaraı betteıdi. Ekinshi jarys kúniniń uzaqtyǵy 160 shaqyrymdy quramaq.
UCI tártibine seıkes bul jarysqa kásipqoı, jartylaı kásipqoı, ulttyq quramalar ári kontı komandalar qatysa alady. Elimizdiń kásipqoı komandasy Astana Pro Team da qatysýdy josparlaýda. 2019 jylǵy saıysta barlyǵy 21 komanda baq synaıtyny kútilýde.
Negizgi kórsetilimdi «Qazaqstan» jáne «Qazsport» telearnalary júrgizedi. Al jarystyń ekinshi kúninde 60 mıllıonǵa jýyq kórermeni bar «Eýrosport» arnasy qosylatyn bolady.
Uıymdastyrýshylar - Almaty qalasy ákimdigi, Qazaqstan velosıped sporty federatsııasy, Velosportty qoldaý jáne damytý qory.
