«Almaty Týry - 2018» halyqaralyq velojarysynyń jeńimpazy anyqtaldy
ALMATY. QazAqparat - Astana Pro Team komandasynyń múshesi ıspandyq Lýıs Leon Sanches «Almaty Týry - 2018» kópkúndik velojarysynyń ekinshi kezeńinde jeńiske jetti, dep habarlaıdy QazAqparat aqparattyq jáne sporttyq HAB-qa silteme jasap.
Ol máre syzyǵyn 4 saǵat 11 mınýt jáne 35 sekýndta kesip ótti. Odan keıin tórt sekýnd aıyrmashylyqpen Delıo Fernandes (Delko Marseille) keldi. Al úshinshi orynǵa birinshi kezeńniń jeńimpazy Davıde Vıllella jaıǵasty.
«Jarys qıyn boldy. Búgin komanda jaqsy jumys istedi jáne sonyń arqasynda jeńiske jettim. Jigitter maǵan jumys istedi, negizi jospar basqasha bolǵan. Biraq jeńiske jetkenimiz úshin qýanyshtymyn. «Týr de Frans» velojarysynda alǵan jaraqatymnan keıin qalpyma keldim, ózimdi jaqsy sezinemin. Ekinshi kezeńde kóterilý aýyr boldy. Biraq men Andorrada turamyn, ol jakta da taýlar bar jáne sol taýly aımaqta jattyǵamyz. «Almaty Týry - 2018» Italııada bolatyn jarystyń aldyndaǵy jaqsy daıyndyq boldy», - dedi ekinshi kezeńniń jeńimpazy Lýıs Sanches.
«Almaty Týry - 2018» velojarysynyń búgingi ekinshi kezeńi «Halyk Arena» kópfýnktsıonaldy kesheniniń aýmaǵynan bastalyp, Medeý shatqalynda aıaqtaldy. Ár elden kelgen 19 klýbtyń ókilderi 160 shaqyrymdy baǵyndyrdy. Qazaqstan atynan jarysqa 4 komanda qatysty.
Ekinshi kezeńniń nátıjesi boıynsha Davıde Vıllella jalpy jikteý boıynsha jeńimpaz atandy, al ıÝrıı Natarov (Ulttyq qurama) úzdik qazaqstandyq shabandoz dep tanyldy.
Olardy QR Mádenıet jáne sport mınıstri Arystanbek Muhamedıuly, Almaty qalasy ákiminiń orynbasary Arman Qyryqbaev, Qazaqstan velosport federatsııasynyń prezıdenti Darhan Káletaev pen Qazaqstan velosport federatsııasynyń vıtse-prezıdenti Raıymbek Batalov quttyqtady.
Halyqaralyq velojarystyń jalpy júlde qory 40 myń eýro boldy.
Eske sala ketsek, keshe «Almaty Týry-2018» kópkúndik velojarysynyń birinshi kezeńinde Astana Pro Team veloshabandozy Davıde Vıllela jeńiske jetken bolatyn.
