«Almaty týry - 2016» velojarysy bastaldy
ALMATY. QazAqparat - «Almaty týry - 2016» bir kúndik tas joldaǵy velojarysy bastaldy, tańǵy 8-30 komandalardy tanystyrý rásimi ótti, dep habarlaıdy «QazAqparat» tilshisi.
«Almaty týry - 2016» veloshabandozdary Ál-Farabı dańǵyly boıymen jarysa otyryp, Mustafın kóshesimen ótip, Shyǵys aınalma jolynan keri burylyp, Talǵar baǵytyna túsedi. Bir aınalym qashyqtyǵy 31 shaqyrym. Jarys jolynyń jalpy qashyqtyǵy 186 shaqyrym.
«Almaty týrynyń» týrynyń basty favorıti Astana kásipqoı velokomandasy jáne onyń kapıtany, «Almaty týrynyń» eki márte jeńimpazy Alekseı Lýtsenko. Astana quramynda álemniń eń myqty veloshabandozdarynyń biri Vınchentso Nıbalı.
30 qyrkúıek kúni BAQ-qa arnalǵan jıynda uıymdastyrýshylar Almaty tas jolynyń daıyndyǵy jáne qatysýshy komandalar men jarystyń bıylǵy erekeshiligi týraly jan-jaqty aıtyp bergen bolatyn.
«Velojarys Almaty ákimdiginiń qoldaýymen ótip otyr. Buǵan deıin saıysty kópkúndik retinde ótkizýdi usynǵanbyz. Alaıda, birqatar máselelerge baılanysty ıdeıamyz júzege aspaı qaldy. Bıylǵy saıysqa biz 20 emes, 14 komanda shaqyrdyq, onyń 3-eýi qazaqstandyq. Osy arada aıta keteıik, sońǵy 5 jylda Qazaqstanda velosport jaqsy damyp keledi», - dedi Qazaqstan Velosport federatsııasynyń vıtse-prezıdenti Amanbek Qýlchıkov.
Aıta keteıik, «Almaty týry» bıyl tórtinshi ret ótkizilgeli otyr. Alǵashqy ret 2013 jyly bastalǵan. 2014 jyly UCI Halyqaralyq velosıpedshiler halyqaralyq odaǵy velojarysqa eń joǵarǵy dıvızıonnyń kásipqoı komandalary oınaıtyn 1.1 kategorııasyn berdi.
Buǵan deıin UCI Halyqaralyq velosıpedshiler odaǵynyń tehnıkalyq keńesshisi, velojarys dırektory Djek Vatson uıymdastyrýshy, qazaqstandyq taraptyń nátıjeli jumys atqarǵanyn atap ótken bolatyn.
«Velojarysty uıymdastyra bastaǵan alǵashqy jylǵa qaraǵanda bıyl jaqsy nátıjeler baıqaýǵa bolady. Uıymdastyrýshylar men Almaty qalasy ákimdigi álemdik deńgeıde ótetin aıtýly básekeler syndy bul velojarysty kópkúndik etip ótkizýdi oılastyrýyna tolyq múmkindik bar dep esepteımin», - degen bolatyn ol baspasóz máslıhatynda.
Velojarysqa Eýropa men Azııanyń 14 komandasy qatysady.
Aıta keteıik, velojarys álemniń eń iri «Eurosport» sport telearnasynda jáne Qazaqstannyń «Kazsport» arnasynan berilip otyr.
Velojarystyń jalpy júlde qory 39 myń eýro. «Almaty týrynyń» jeńimpazy 15 myń eýro, ekinshi jáne úshinshi oryndarynyń ıeleri 10 jáne 5 eýrodan alady. Sonymen qatar, 20-orynǵa deıingi qatysýshylar marapattalady.
