«Almaty-Túrkistan» velomarafony Túrkistan oblysyna kelip jetti

Shara barysynda aýdandyq mádenıet bóliminiń qyzmetkerleri patrıottyq ánder shyrqap, qonaqtarǵa Túlkibastyń almasy men ár túrli taǵamdar usyndy.Sportshylardy kútip alǵan aýdan basshylary olarǵa qurmet kórsetip, izgi tilekterin jetkizdi.

«Elbasy «Bolashaqqa baǵdar: rýhanı jańǵyrý» atty maqalasynda ár qazaqstandyq jańǵyrýdy ózinen bastaý qajettigin aıtqan bolsa, búgingi velomarafonǵa qatysýshylarymyz elimizge ǵana emes, búkil álemge úlgi bolatyndaı sharaǵa atsalysyp, jańǵyrýdyń aıqyn úlgisin kórsetýde. Osy jerde erekshe aıtarym, ómirdiń aýyr taýqymetiń basynan ótkizgen zaǵıp jandarymyzben arbaǵa tańylsa da, ómirden túńilmeı qoǵamdyq sharalardan qalys qalmaı júrgen azamattarymyzǵa barsha túlkibastyqtar atynan erekshe qurmet pen alǵys bildiremin», - dedi Túlkibas aýdany ákiminiń orynbasary B.Ahmetov.

Sondaı-aq, jergilikti bılik ókilderi salaýatty ómir saltyn nasıhattaýǵa baǵyttalǵan aýqymdy sharanyń ótkizilýine qoldaý kórsetken «El tiregi» Qazaqstandyq shaǵyn jáne orta bıznes qaýymdastyǵyna, «Anashym» qoryna jáne «Shekarasyz sport» jobasyn uıymdastyrýshylar men basqa da osy marafonǵa atsalysyp júrgen el azamattaryna alǵystaryn jetkizdi. Al, qonaqtar bolsa sonaý syı-qurmet kórsetip, qonaqjaılylyqtaryn tanytqan túlkibastyqtarǵa alǵystaryn jetkizdi.

Aıta keteıik, «Shekarasyz sport» jobasy aıasynda Túrkistan oblysy ákimdiginiń uıymdastyrýymen ótip jatqan marafonǵa kózi kórmeıtin sportshylardan basqa da azamattar qatysýda. Olardyń qatarynda «Qazaqstannyń 100 jańa esimi» jobasynyń jeńimpazdary Zúlfııa Gabıdýllına (paraolımpıadalyq chempıon) men Baqtııar Bazarbekov (qoǵam qaıratkeri), shekarasyz sport jobasynyń rejısseri jáne jetekshisi Valıhan Ten (World Class dırektory) jáne taǵy da basqa elge tanymal jandar bar.