«Almaty - Túrkistan» týrıstik poıyzy jolǵa shyqty

Týrıster úshin qolaıly sanalatyn kólik túri qos shahardyń arasynda ár aptanyń juma-jeksenbi aralyǵynda júretin bolady, dep habarlaıdy QazAqparat tilshisi.

Týrıstik baǵyttyń saltanatty ashylý rásimine oblys ákiminiń orynbasary Erbol Tasjúrekov pen «Týran-Ekspress» kompanııasynyń basshylyǵy, týrızm salasynyń mamandary jáne BAQ ókilderi qatysty.

Sharada Erbol Tasjúrekov óńirde alǵash ret qolǵa alynyp, jumysyn bastaǵan týrıstik baǵyttyń Túrkistanǵa keletin týrıster sanyn odan ári kóbeıtetinine senim bildirdi. Týrızm salasyn damytýǵa tıgizetin septiginiń mol ekenin jetkizdi.Túrkistan shaharyna saıahattyq poıyzben kelýshi qonaqtar eki kún boıy vagondarda qonyp, oblystyń kórikti jerlerin aralaı alady. 22 saıahatshyǵa arnalǵan vagondar jatyn oryn, dýsh syndy barlyq qajettiliktermen qamtylǵan. Týrıster satyp alynǵan týrıstik paket esebinen poıyz meıramhanasynda tamaqtanýyna jaǵdaı jasalǵan.

Atalǵan poıyz baǵyty aıasynda kelgen qonaqtarǵa aqparattyq týr uıymdastyryldy. Meımandar aldymen, Otyrar, Saýran qalashyqtarynda bolyp, odan soń, «Áziret-Sultan» memlekettik tarıhı-mádenı qoryq murajaıynyń nysandaryn kórip, tanysady.

Eske sala ketsek, elimizdegi «Týran-Ekspress» JShS kóliktik kompanııasy men oblystyq Jolaýshylar kóligi jáne avtomobıl joldary, Týrızm jáne syrtqy baılanystar jáne Іshki saıasat basqarmalary arasynda Túrkistan oblysynda ishki týrızmdi damytý maqsatynda ózara yntymaqtastyq týraly memorandým túzilgen bolatyn.