Almaty turǵynynyń salyqqa qaryzy 1,8 mln teńgege jetken

NUR-SULTAN. QazAqparat – Salyq bereshegin ótegen azamattardyń kópshiligi - Almaty qalasynyń turǵyndary, dep habarlaıdy QazAqparat.

Qarjy mınıstrligi Memlekettik kirister komıtetiniń habarlaýynsha, 2019 jylǵy 10 qazandaǵy jaǵdaı boıynsha 334 127 jeke tulǵa 7,9 mlrd teńge kóleminde salyqtyq bereshegin ótep, 1,64 mlrd teńge ósimpul esepten shyǵarylǵan.

«Qaryz óteý boıynsha Almaty qalasy birinshi orynda (65 042 adam) bolsa, Aqtóbe (34 68 adam) men Qostanaı (28 975 adam) oblystary úzdik úshtikti túıindep tur», - delingen habarlamada.

Tólengen salyq somalary boıynsha Almaty qalasy alda tur. Qala turǵyndarynyń salyqqa bereshegi qazirgi ýaqytta 4 mlrd 440 mln teńgeni quraıdy. 2019 jyldyń 1 qańtarynda Almaty boıynsha salyq qaryzy - 5,5 mlrd teńge bolatyn.

«Jınalǵan salyq qaryzy boıynsha osy aptadaǵy reıtıng kóshbasshysy – Almaty qalasynyń turǵyny. Ol kólik salyǵy boıynsha 1 862 999 teńge kólemindegi negizgi borysh somasyn tólep, atalǵan somadan 1,5 ese asyp túsetin ósimpul esepten shyǵaryldy (2 745 000 teńge)», - deıdi baspasóz qyzmeti.

Eske sala ketsek, 3 - 10 qazan aralyǵynda 21 275 jeke tulǵanyń 74,8 mln teńge kólemindegi ósimpuly esepten shyǵarylǵan bolatyn.

Avtor: Zarına Qaharman