Almaty turǵynyna qarýly shabýyl jasaý týraly is polıtsııanyń baqylaýynda
ASTANA. QazAqparat - Polıtsııa Úlken Almaty ózeni mańynda áıeldi pyshaqpen qorqytyp tonaǵan eki belgisiz adamdy izdep jatyr, dep habarlaıdy «QazAqparat» HAA tilshisi.
Bul isti Almaty ІІD basshylyǵy jiti baqylaýyna alǵan. Qazir Bostandyq AІІB «tonaý» baby boıynsha sotqa deıingi tergeý amaldaryn júrgizip jatyr.
«Qazirgi tańda polıtsııa osy qylmysty tergep jatyr. Buryn sottalǵandar, quqyq qorǵaý organdarynyń esebinde turǵandar tekserilýde. Oqıǵa bolǵan jerge jaqyn mańdaǵy qurylys nysandary, vıdeobaqylaý júıesi tekserilip jatyr. Budan bólek, kýágerlerdi anyqtaý jáne dálelder jınaý jumystary júrgizilip jatyr», - dep málimdedi Almaty ІІD baspasóz qyzmetiniń basshysy Saltanat Ázirbek.
Eske salaıyq, almatylyq Alýa Rahymjanova Facebook paraqshasynda anasynyń 10 jeltoqsan kúni túngi saǵat 22.00-de Ál-Farabı dańǵyly men Navoı kóshesi aýdanynda Úlken Almaty bógetinde serýendep júrgenin jazǵan. Sol kezde áıeldiń janynda eki jas jigit júgirip kelip, ony ıterip, tamaǵyna pyshaq taqap qorqytady. Qyzynyń aıtýynsha, olardyń bireýi anasyn uryp, qarańǵy jerge súırep alyp barmaq bolǵan. Keıin buzaqylar onyń uıaly telefonyn tartyp alyp, oqıǵa ornynan izin sýytady.
«Ol qatty eseńgirep, aýyrǵanyn da sezbegen. Men onyń aıaǵynyń qanap jatqanyn baıqap, jedel járdem men polıtsııany shaqyrdym. Anam telefonsyz jol boıy jaralanǵan aıaǵymen úıge kelgen, oǵan eshkim kómektespegen», - dep jazdy zardap shegýshiniń qyzy.
Zardap shegýshiniń shaǵymynan keıin polıtsııa aımaqty tekserip, kúdiktilerdi izdep jatyr.
