Almaty turǵynyn urlap áketip, uryp-soǵyp aqsha talap etkender ustaldy
Bostandyq aýdandyq polıtsııa basqarmasynyń málimetinshe, aldyn ala tergeý derekterine sáıkes, 40 jastaǵy almatylyqty úsh adam urlap áketip, jaldamaly páterde ustap, kúsh qoldanǵan jáne 1 mln teńgesin tartyp alǵan.
Kúdiktiler aldymen jábirlenýshiniń uıaly telefony men altyn shynjyryn tartyp alǵan.
«Qajetti kólemde aqshasy bolmaǵan soń kúdiktiler jábirlenýshi G-dan aqshany tanystarynan alyp berýdi talap etken. Jábirlenýshi jolda patrýldik kólikti kórip, kómek surap aıqaılaı bastaǵan, sol ýaqytta kúdiktiler qasha jónelgen. Alaıda olar kóp uzamaı qolǵa tústi. Bul - 1995 jyly týǵan F. esimdi Almaty oblysynyń turǵyny bolyp shyqty. Al onyń sybaılastary 1994 jylǵy S. men 1996 jyly týǵan J. Shyǵys Qazaqstannan. Kúdiktiler QR QPK-niń 128-babyna sáıkes ýaqytsha ustaý ızolıatoryna qamaldy», - dedi, Bostandyq aýdandyq polıtsııa basqarmasynyń bastyǵy, polıtsııa polkovnıgi Maqsat Qanapıaev.
Atalǵan derek QR QK-niń 194-baby 3-bóligi (bopsalaý) jáne QR QK-niń 125-baby 2-bóligi (adam urlaý) boıynsha sotqa deıingi tergeýdiń biryńǵaı tizilimine tirkeldi.
Sondaı-aq, polıtsııa qyzmetkerleri QR QPK-niń 201 baby jáne QR Konstıtýtsııasynyń normalaryna sáıkes, qylmystyń basqa da mán-jaılary jarııa etýge jatpaıtynyn málim etti.
Jýrnalısterge shabýyl uıymdastyrdy degen kúdiktiniń sybaılastary anyqtalǵanyn jazdyq.