Almaty turǵynyn dárigerler bastaǵy sırek kezdesetin asqynýdan aman alyp qaldy
Almaty qalalyq Qoǵamdyq densaýlyq saqtaý basqarmasynyń málimetinshe, qalanyń 43 jastaǵy turǵyny buryn tóbeles kezinde bas-mı jaraqatyn alǵan. Keıin naýqastyń sol kóziniń kórýi nasharlap, kóz almasy uıasynan shyǵyp, qyzara bastaǵan, sol qulaǵynda shý paıda bolǵan.
Aýrýy ádben shydatpaıtyn deńgeıge jetkende naýqas Almaty qalalyq Jedel shuǵyl kómek kórsetý aýrýhanasyna (QJShKKA) júgingen. Naýqastyń basyna MRT/MRA jasalyp, denesiniń sol jaq bóliginde kúretamyr-qýysty saǵalar qosylysy (karotıdno-kavernoznoe soýste) anyqtaldy.
Osylaısha, naýqasqa QJShKKA-nyń neırohırýrgııa bólimshesinde ballon kómegimen deneniń sol jaǵyndaǵy kúretamyr-qýysty saǵalar qosylysyn mıkrospıraldarmen rekonstrýktıvti embolızatsııalaý otasy jasaldy.
«Naýqasty emdeý barysynda Kóz aýrýlary ǵylymı-zertteý ınstıtýtynyń oftalmolog dárigeri I.Rasýlovpen birlesip jumys istedik. Osynyń arqasynda naýqastyń kózin saqtap, aýyrsynýdy joıýǵa múmkindik týdy. Hırýrgııalyq aralasýdan soń naýqastyń kórý men kóz-qozǵalys fýnktsııalary ishinara qalpyna keldi, qulaqtaǵy shý joǵaldy, kózdiń shyǵyńqylyǵy basyldy, eń bastysy jan tózgisiz aýyrsynýlar basyldy. Operatsııa naýqasqa ary qaraı ómir súrúge múmkindik berdi», - dedi QJShKKA neırohırýrg dárigeri Maksım Argýmbaev.
Aıta keteıik, operatsııa 2 saǵatqa sozyldy. Ol úshin 10 mıkrospıral qajet boldy.
