Almaty turǵyny joǵalǵan ulyna 7 jyldan soń izdeý sala bastady
ASTANA. QazAqparat - QR Іshki ister mınıstrligi 7 jyl buryn iz-túzsiz ketken er adamǵa izdeý jarııalady, dep habarlaıdy QazAqparat tilshisi.
«Kishibaev Aıdar Naýhanulynyń týystary ony izdeýge kómektesý týraly ótinish berdi. Ulynyń iz-túzsiz ketkeni týraly anasy polıtsııaǵa habar bermegen», - deıdi ІІM ókilderi.
11 sáýirde «QazAqparat» redaktsııasyna Eýrazııa zań akademııasynyń oqytýshysy Alıma Skagıevanyń stýdentteri habarlasyp, onyń 7 jyl buryn ketken uly áli kúnge oralmaǵanyn aıtqan bolatyn.
Áıeldiń aıtýynsha, ol «Jdı menıa», «Barmysyń, baýyrym?» baǵdarlamalarynyń kómegine júgingen. Alaıda quqyq qorǵaý organdaryna senimsiz bolǵandyqtan polıtsııaǵa ótinish jazbaǵan.
«Ulym úıden ketkeli áli oralǵan joq. Onyń kórý qabileti nashar edi, bir kóziniń janary - mınýs 7,5, ekinshisi - 5,5. Kelesi kúni ol oftalmologııa ınstıtýtyna barýy tıis edi. Aptalap joǵalyp ketetin ádeti joq emes edi. Men ulym oralady dep úmittenip júre berdim», - deıdi áıel.
Kishibaev Aıdar Naýhanuly 1971 jylǵy 18 qazanda Almaty oblysy, Qapshaǵaı qalasynda týǵan. Ulty qazaq, boıy 170 sm, salmaǵy 65-66 kg, shashy aǵarǵan. 2011 jylǵy 27 aqpanda Almatynyń Abaı-Masanshy kósheleriniń qıylysyndaǵy úıinen shyǵyp ketip, qaıtyp oralmaǵan. Sol kezde ústinde qysha tústi kúrtke, qara djınsy shalbar bolǵan.
Ol týraly birer aqparatqa ıe adamdardan redaktsııaǵa nemese +7778 3866650 nómirine habar berýin suraımyz.
