Almaty turǵyny urlanǵan kólikpen 1 adamdy mert qyldy
ALMATY. QazAqparat - Almatyda 20 jastaǵy jigit kólik urlap, jol apatyn jasady. Saldarynan 1 adam kóz jumyp, taǵy biri aýrýhanaǵa tústi, dep habarlaıdy QazAqparat tilshisi.
Hmelnıtskıı men Gete kósheleriniń qıylysynda bolǵan jol-kólik apaty kóshedegi beınebaqylaý kameralaryna túsip qaldy.
«102» pýltine Toyota Land Cruiser Prado kóliginiń urlanǵany týraly aqparat kelip tústi. Onyń ıesi kóliktiń Seıfýllın dańǵylynyń boıynda turǵanyn habarlady. Jedel-izdestirý sharalary barysynda kúdiktiniń jeke basy anyqtaldy. Ol shahardyń 20 jastaǵy A.esimdi turǵyny bolyp shyqty. Kameralardan urlanǵan kóliktiń úlken jyldamdyqpen qozǵalǵandyǵy anyq kórinedi. Apat saldarynan Grand Cherokee kóliginiń 19 jastaǵy jolaýshysy aýrýhanada kóz jumdy, al júrgizýshi áli aýyr halde jansaqtaý bóliminde jatyr. Toyota júrgizýshisi jol apatynan keıin oqıǵa ornynan qashyp ketti. Anyqtalǵandaı, ol mas bolǵan», – dedi Almaty qalalyq Polıtsııa departamenti Krımınaldyq polıtsııa basqarmasynyń bastyǵy Qýatbek Naýatov.
Qazirgi ýaqytta ustalǵan azamatqa qatysty qylmystyq áreketti qujattandyrý sharalary júrgizilýde. Atalǵan fakti Qylmystyq kodekstiń úsh baby: QR QK-niń 345-baby 3-bóligi, 347-baby jáne 200-baby 3-bóligi boıynsha tergelýde. Qaskóı ýaqytsha ustaý ızolıatoryna qamaldy. Sondaı-aq, onyń buǵan deıin eki ret sotty bolǵany anyqtaldy.
