Almaty turǵyny tórt lombardtan 110 mln teńgeni aldap alyp ketken
ALMATY. QazAqparat – Almatyda 4 lombardty 110 mln teńgege aldaǵan alaıaq ustaldy, dep habarlaıdy QazAqparat tilshisi.
Qalalyq Polıtsııa departamenti málim etkendeı, 31 jastaǵy almatylyq megopolıste birneshe lombardty taqyrǵa otyrǵyzǵan. Ol jalǵan kepil qujattaryn jasaý arqyly 110 mln teńge tapqan.
«Kúdikti buryn qylmystyq jaýapkershilikke tartylmaǵan. Ol óziniń «Kadıllak Eskaleıd» avtokóliginiń VIN kodyn ózgertip, atalǵan kólikti basqa memleketten elge endi ǵana ákelingendeı etip kórsetken. Sonymen qatar kólikti birneshe ret týystaryna jáne dostaryna tirkegen. Ári qaraı ol qujattary jańartylǵan kólikti lombardqa aparyp, avtokólikti kólik júrgizý quqyǵymen kepilge qoıdy. Qarapaıym tilmen aıtqanda, joq djıptiń qujattaryn kepil retinde qaldyryp, qomaqty somany ıemdengen. Osylaısha alaıaq qaladaǵy tórt lombardty aldaǵan»,– dedi Almaty qalasynyń PD tergeý basqarmasy bastyǵynyń orynbasary Muhamedálı Seısenuly.
Qazir onyń ústinen QR QK-niń 190-babynyń 4-bóliginiń 2-tarmaǵy boıynsha (asa iri kólemde jasalǵan alaıaqtyq) is qozǵaldy.
