Almaty turǵyny óz kóligin urlap, polıtsııa qyzmetkerin jaraqattady
ALMATY. QazAqparat - Almatyda 34 jastaǵy er adam óz kóligin ózi urlap, polıtsııa qyzmetkerin soqqyǵa jyqty, dep habarlaıdy QazAqparat tilshisi.
Qalalyq polıtsııanyń habarlaýynsha, «Dostyq» shaǵyn aýdanynan «Toıota Kamrı-55» kóliginiń urlanǵany týraly aqparat túsken. Almatylyq turǵynnyń sózinshe, shyǵyn kólemi 8 mln teńgeni quraǵan.
«Jábirlenýshi aryzynda dostarymen birge dámhanaǵa barǵanyn, shyqqanda kólikti tappaı qalǵanyn aıtqan. Al kóliktiń artyq kiltin munyń aldynda joǵaltyp alǵanyn habarlady. Atalǵan derek boıynsha sotqa deıingi tergeý jumystary qolǵa alyndy. Syrtqy baqylaý kameralaryn teksergen kezde eki er adamnyń mashınaǵa taıanǵany, ony ońaı otaldyryp, oqıǵa ornynan ketip qalǵany anyqtaldy. Jáne bul, jábirlenýshi dostarymen dámhanaǵa kirgennen keıin nebári eki mınýttan soń bolǵan», - dedi qalalyq Polıtsııa departamentiniń basqarma basshysy Esen Ysqaqov.
Tekserý barysynda avtokólikti jábirlenýshiniń synyptastary urlap ketkeni anyqtaldy.
«Jaýap alý kezinde kúdiktiler kólikti qojaıynnyń aıtýymen urlaǵandaryn aıtty. Avtokólikti jábirlenýshi byltyr satyp alǵan. Kólik urlyqqa qarsy saqtandyrylǵan. Osylaısha, kólikti urlatyp jiberip, saqtandyrý polısin alǵysy kelgen», - dedi E.Ysqaqov.
Endi kólik ıesi QR QK 419-baby boıynsha sot aldynda jaýap beredi. Ol 3-7 jylǵa bas bostandyǵynan aıyrylýy múmkin.
«Urlanǵan» kólik Almaty oblysynda tabyldy.
«Jábirlenýshi kólikti áke-sheshesiniń úıine aparyp tyǵyp qoıǵan. Ol sol jerde qarsylyq kórsetip, qashyp ketpek bolǵan. Ustaýǵa kelgen polıtsııa qyzmetkerin buraǵysh saımanymen jaraqattaǵan. Endi ol bılik ókiline qol kótergeni úshin de jaýap beretin boldy», - dedi basqarma basshysy.
