Almaty turǵyny lımonadtan «Dizzy» jasap satty
ALMATY. QazAqparat - Almatyda er adam energetıkalyq sýsyndy qoldan jasap kelgen. Astyrtyn tseh Shańyraq shaǵyn aýdanynda ornalasqan, dep habarlaıdy QazAqparat tilshisi.
Jasyryn óndiris ornyn Almaty oblysy boıynsha Memlekettik kirister departamenti Ekonomıkalyq tergeý qyzmetiniń ókilderi anyqtady.
Mekemeniń baspasóz qyzmeti habarlaǵandaı, er adam «Dizzy Energy» taýarlyq markasymen energetıkalyq sýsyndardy qoldan jasap kelgen.
«11-tamyzda júrgizilgen jedel-tergeý jumystary barysynda Almaty oblysy MKD Ekonomıkalyq tergeý qyzmetiniń ókilderi Almaty oblysy Іle aýdanynda Qazaqstan Respýblıkasynyń azamatyn ustaǵan bolatyn, ustalǵan azamat «Dizzy» taýarlyq markasymen kontrafaktilik sýsyndy Almaty qalasy men Almaty oblysy aýmaǵynda satyp kelgendigi anyqtaldy», - dedi baspasóz qyzmetindegiler.
Budan ári júrgizilgen tekseris barysynda Almaty qalasy Shańyraq yqsham aýdanynda energetıkalyq sýsyndy qoldan jasaıtyn astyrtyn tseh anyqtalǵan.
«Ol arzanyraq lımonadqa lımon qyshqyly men túrli tús beretin qospalardy aralastyryp, 1 bótelke lımonadtan 3 bótelke «Dizzy» shyǵaryp otyrǵan. Óziniń taýarlaryn Almaty oblysynda satyp kelgen. Óndiris ornynan «Dizzy» bos bótelkeleri, «Zolotoe Koltso» sýsyndarynyń bos ydystary jáne qoraptardy oraýǵa arnalǵan polıtelen rýlondary tárkilengen bolatyn», - dedi baspasóz qyzmetinen.
Qazirgi tańda QR QK 198-babynyń 2-bóligi sotqa deıingi tergeý amaldary júrgizilýde.
