Almaty turǵyny kóshede áıeldi pyshaqtap, ara túsken turǵyndy da soqqyǵa jyqty
ALMATY. QazAqparat - Almatyda Ulttyq ulan sarbazy eki áıelge shabýyl jasaǵan er adamdy ustady, dep habarlaıdy Polisia.kz.
18 shilde kúni saǵat túngi 23.50 kezinde Ulttyq ulannyń 5571 áskerı bóliminiń áskerı qyzmetshisi Jarqynbek Aıdarhanbekov otbasymen úıinde otyrǵanda syrttan aıǵaılaǵan daýysty estıdi.
Júgirip shyqqanda Qalqaman-2 yqsham aýdanyndaǵy Lapın kóshesi, 21 úı aldyna belgisiz er adamnyń áıelge shabýyl jasap jatqanyn kóredi.
Sol ýaqytta áıelge kómekke kelgen turǵyn da zardap shekti.
Aǵa serjant Aıdarhanbekov kómek kórsetý úshin dereý oqıǵa ornyna qaraı júgirip barady.
Qylmysker sarbazdy kórip, sol mańdaǵy zıratqa qaraı qashady.
Ulandyq jaýynger onyń sońynan qýyp, jol-jónekeı jedel járdem men polıtsııa qyzmetine habar beredi.
Jarqynbek sytyrlaǵan dybys pen entikken daýsynan qylmyskerdi tanyp, otyrǵan jerinen ustap alady.
Jedel medıtsınalyq kómek pen polıtsııa qyzmetkerleri kelgenshe, tutqyndy ustap turady.
– Oılanyp turatyn ýaqyt bolǵan joq. Bar baıqaǵanym, qyz bala jerde álsirep jatty. Ne bolsa da ony qolǵa túsirýdi kózdedim. Mundaı jaýyzdyq jazasyz qalmaýy kerek, – deıdi sarbaz.
Aǵa serjant Aıdarhanbekov ustalǵan qylmyskerdi oqıǵa ornyna kelgen polıtsııa qyzmetkerlerine tapsyrǵan.
Zardap shekken áıelderge alǵashqy medıtsınalyq kómek kórsetilip, aýrýhanaǵa jetkizildi.
Almaty qalasy PD habarlaýynsha, atalǵan fakti QR QK 106-baby 2-bóligi boıynsha tirkelgen.
– Kúdikti 31 jastaǵy er adam ustalyp, ýaqytsha ustaý ızolıatoryna qamaldy. Qazirgi ýaqytta Naýryzbaı aýdandyq polıtsııa basqarmasy istiń mán-jaıyn anyqtaý úshin jan-jaqty tolyq tergeýge baǵyttalǵan is-sharalardy júrgizip jatyr, – dedi polıtsııa.
Foto: polisia.kz