Almaty turǵyny koronavırýs juqtyrdy degen aqparat jalǵan - ákimdik
ALMATY. QazAqparat – Almaty qalalyq qoǵamdyq densaýlyq saqtaý basqarmasy koronovırýsqa shaldyqqan naýqas týraly aqparatty joqqa shyǵardy, dep habarlaıdy QazAqparat tilshisi.
WhatsApp arqyly Almatyda koronavırýs juqtyrǵan adam bar degen aqparat tarap jatyr.
«Almaty qalalyq densaýlyq saqtaý basqarmasy aýrýhanaǵa jatqyzylǵan naýqasta koronovırýs ınfektsııasy tabylmaǵanyn habarlaıdy» delingen densaýlyq saqtaý basqarmasynyń habarlamasynda.
Vedomstvonyń málimetinshe, búgin jedel járdem qyzmetine Gonkongtan túnde ushyp kelgen qala turǵynynan qońyraý túsken. Ol óziniń qaltyrap, dene qyzýynyń kóterilip turǵanyn aıtyp shaǵymdanǵan.
Arnaıy kıim kıgen jedel járdem dárigerleri dereý kórsetilgen mekenjaıǵa jiberildi. Jedel respıratorly vırýstyq ınfektsııanyń klınıkalyq belgileri bar naýqas qalalyq klınıkalyq juqpaly aýrýlar aýrýhanasyna jetkizildi.
«Aýrýhanada naýqasty dárigerler arnaıy boksta tekserdi. Oǵan «ortasha aýyr deńgeıdegi tumaý» dıagnozy qoıyldy. Sonymen qatar qajetti vırýstyq taldaýlar alynyp, emdeý bastaldy», - dep tolyqtyrdy basqarmadaǵylar.
Qytaıdaǵy koronavırýs ınfektsııasynyń qolaısyz epıdemıologııalyq jaǵdaıyna baılanysty naýqas dárigerlerdiń jiti baqylaýyna alyndy.
