Almaty turǵyny aýrýhanada naýqastarǵa beriletin tamaqtyń sapasyna shaǵymdandy

ALMATY. QazAqparat – Almaty turǵyny aýrýhanada jatqan qaryndasyna sapasy nashar taǵam beriletinin aıtyp shaǵymdandy, dep habarlaıdy QazAqparat tilshisi.

Shaǵymdy áleýmettik jelige jarııalaǵan avtor júkti qaryndasynyń «Qalqaman-1» shaǵyn aýdanyndaǵy aýrýhanaǵa túskendigin jazǵan. Sonymen qatar patologııa bólimine jatqyzylǵan qaryndasyna berilgen tamaqtyń sýretin qosa júktegen.

Jaǵdaıǵa Almaty qalalyq №1 klınıkalyq aýrýhanasy túsinik berdi.

Aýrýhananyń málimetine sáıkes, atalǵan másele boıynsha komıssııa qyzmettik tekseris jasalǵan.

Tekseris kezinde perzenthana jaǵdaıynda statsıonarlyq emdeýdegi barlyq júkti jáne bosanǵan áıelder arasynda saýalnama júrgizilgen.

Saýalnama qorytyndysy boıynsha aýrýhanadaǵy búkil áıel tamaqtyń sapasyna «100% qanaǵattanarlyq» dep jazǵan.

Onymen qatar aýrýhana statsıonarda emdelip jatqan naýqastarǵa dıetalyq ústelge sáıkes tamaq beriletindigin málimdedi.

«Árbir aýrýǵa ruqsat etilgen azyq-túlik pen taǵam túri bolady. Deni saý adamdar tutynatyn taǵamnyń bári birdeı naýqastarǵa berile bermeıdi. Emdeý (dıetalyq) ústelderi QR Úkimetiniń 2002 jylǵy 26 qańtardaǵy №128 qaýlysyna sáıkes jasalady. Tamaq tehnologııalyq karta boıynsha pisiriledi»,- dedi aýrýhana.

Aýrýhana taǵamdy taratý aldynda onyń dámi men óniminiń qaýipsizdigine baǵalaý júrgiziletindigin málimdedi.

Sonymen qatar arnaıy jýrnalda kezekshi dáriger nemese epıdemıolog dáriger kúndelikti daıyndalatyn taǵamdardyń sapasy týraly belgi qoıatyndyǵy týraly aıtyldy.

«Aýrýhanada as blogyn turaqty túrde baqylaıtyn ınfektsııalyq baqylaý komıssııalary, brakeraj komıssııasy (IBK, BK) jumys isteıdi. Saraptama boıynsha tamaqtan ýlaný, taǵamdy sapasyz daıyndaý derekteri tirkelmegen», - dep jaýap berdi aýrýhana.

Osyǵan oraı, №1 aýrýhanada tamaqtaný rejımi men sapasyna qatysty normatıvtik quqyqtyq aktiler buzylmaǵan.