Almaty turǵyny asyrandy balasyn týǵan anasyna bermeıtin boldy
ALMATY. QazAqparat - Almaty turǵyny asyrandy balasyn týǵan anasyna bermeıtin boldy. Gúljan Qılybaeva balanyń bıologııalyq anasymen eki jyl boıy sottasyp, aqyry jeńip shyqty, dep habarlaıdy QazAqparat tilshisi.
Eki jylǵa sozylǵan sot protsesine Almaty jasóspirimderderdiń isin qaraıtyn aýdanaralyq sottyń sýdıasy núkte qoıdy.
Daýly isti sheshýge QR Joǵarǵy sotynyń tóraǵasy Qaırat Mámı men Almaty qalalyq prokýratýrasy kirisken bolatyn.
«Sot úkimi Gúljannyń paıdasyna sheshilgenine óte qýanyshtymyz. Bul Qılybaevtar úshin ǵana emes, barlyq bala asyrap alam degen otbasylardyń úmitin oıatary sózsiz. Balasynan bas tartqan anany sotqa shaqyrýdyń keregi joq. Bul bala asyrap alýdyń qupııasyn buzady. Asyrap alǵan anany nege artyq qaǵaz toltyrýǵa, balanyń týǵan anasymen baılanysýǵa májbúrleıtini túsiniksiz. Adamdar balaǵa baýyr basyp ketedi. Odan keıin aırylysý qıyn bolady. Adamdar baýyr basyp qalǵan balasyn bergisi kelmeı qatty qobaljıdy. Bizde bala asyrap alýshy otbasylardyń ınstıtýtyn qurý kerek. Bul birinshi kezekte balanyń bolashaǵy úshin mańyzdy. Oqıǵa osymen aıaqtalady dep úmittenemiz», - dedi «Dom» qaıyrymdylyq qorynyń jetekshisi Arýjan Saın.
Aıta ketý kerek, Gúljan Qılybaeva náresteler úıinen 2016 jyly sábı asyrap alǵan bolatyn. Balanyń týǵan anasy odan perzenthanada bas tartqan.
Qılybaevtar otbasy balany asyrap alýǵa qujat jınaǵan kezde sábıdiń týǵan anasynyń ruqsatyn taǵy bir alý kerek bolǵan. Quzyrly organdar týǵan anasymen habarlasqanda, ol balasyn qaıtyp alǵysy keletinin jetkizgen.
Gúljan Qılybaevany asyrap alǵan balasynan ajyratý týraly is 2016 jyly bastalǵan bolatyn. Alǵashqy sot ınstantsııasy balany týǵan anasyna qaıtarý týraly sheshim shyǵarǵan edi.
2017 jyldyń aqpanynda Gúljan Qılybaeva sot úkimine apellıatsııalyq shaǵym túsiredi.
Aqpan aıynyń sońynda qoǵam qaıratkeri Arýjan Saın QR Prezıdenti Nursultan Nazarbaevqa, QR Joǵarǵy sotynyń tóraǵasy Qaırat Mámıge ashyq hat jazyp, kómek suraǵan bolatyn.
