Almaty turǵyny ákimnen qala ishindegi kólik bazaryn syrtqa kóshirýdi surady
Áýezov aýdanynyń turǵyndarymen kezdesý barysynda qala turǵyny Car City avtobazaryna qala men oblystan kúnde myńdaǵan avtokólik keletinin, olardyń tipti úıdiń aýlasyna deıin kirip, kólik qoıatynyn, úılerdiń mańaıynda bos oryn qalmaǵanyn aıtty.
«Osyǵan baılanysty kólik bazary qaladan áketilse» degen ótinishin jetkizdi ol.
Erbolat Dosaev atalmysh máseleni sheshý úshin jumys júrip jatqanyn, degenmen, ol ońaı sharýa emestigin alǵa tartty.
«Bul máselede biz eń aldymen menshik quqyǵyna tap bolamyz. Ókinishke qaraı, jerdiń menshik aktileri buryn shyǵyp, berilip ketken. Eger bazardy basqa jerge kóshirsek, oǵan jańa oryn tabý kerek ári menshik ıesine onyń ornyna basqa nárseni usyný kerek. Alaıda, bul biz eshteńe isteı almaımyz degen sóz emes»,- dedi qala ákimi.
Ol qalada jalǵa berilgen ýchaskelerdi maqsatsyz paıdalaný faktileri bar ekenin málimdedi.
«Mysaly, tehnıkalyq qyzmet kórsetý ortalyqtary men túrli qurylystar elektr jelilerine zańsyz qosylǵan. Sondyqtan bul nysandardy alyp tastaýǵa bolady jáne ol qajet. Onyń ústine qyzmet túrleri boıynsha biz neniń zańdy, neniń zańsyz, ne qajet, ne qajet emes ekenin anyqtap alýymyz kerek. Endi biz birtindep bárin retke keltire bastaımyz. Bul jumysty aýdan ákimi men aýdandyq prokýratýraǵa tapsyramyn»,- dedi Erbolat Dosaev.
