Almaty turǵyny 6,5 mlrd teńgeniń zańsyz aqsha aınalymyn júrgizgen

ALMATY. QazAqparat - Almatyda er adam óziniń enshiles kompanııalary arqyly 6,5 mıllıard teńgege kommertsııalyq uıymdarǵa jalǵan shot-faktýra bergen, dep habarlaıdy QazAqparat tilshisi.

Almaty prokýratýrasynda atap ótkendeı, qalalyq prokýratýra ekonomıkalyq tergeý departamenti jáne qalalyq sot birlesip jalǵan shot-faktýralardy jasaıtyndardy anyqtaý maqsatynda turaqty jumys júrgizýde.

«Nátıjesinde qala sottaryna 19,5 mlrd teńgege shot-faktýralar jazylǵan 8 qylmystyq is joldandy. Osylaısha, qolma-qol aqshaǵa aınaldyrýshylar kontragentterge 5,4 mlrd teńgeden astam somaǵa salyqtan jaltarýǵa kómekteskender anyqtaldy. 5 kinálige qatysty aıyptaý úkimi shyǵarylyp jáne taǵy 16-sy sot talqylaýynda, olardyń altaýy 2 jyl boıy turaqty qyzmet etken uıymdasqan qylmystyq topty qurǵan»,– dep habarlady qalalyq prokýratýra.

Mysaly, Almaty qalasynyń turǵyny óziniń úlestes kompanııalary arqyly túrli kommertsııalyq uıymdarǵa 6,5 mlrd teńgege salyq tóleýden jaltarýlary boıynsha qyzmet kórsetken.

Osyǵan baılanysty Almaty qalasynyń prokýratýrasy úshinshi tulǵalar aqshalaı syıaqy nemese bir jolǵy paıda alý maqsatynda menshik nysanyna qaramastan óz atyna uıymdardy tirkeýdi/qaıta tirkeýdi usynatyn azamattardy saqtandyrady.

Mundaı áreketter úshin QR QK-niń 216-baby boıynsha qylmystyq jaýap qarastyrylǵan.