Almaty turǵyny 40 jyldan keıin temekini tastady
ALMATY. QazAqparat – Temeki shegýdi bozbala shaqta bastaǵan 68 jastaǵy almatylyq 40 jyldan keıin odan bas tartty. Bul týraly qalalyq psıhıkalyq densaýlyq ortalyǵynyń baspasóz qyzmeti málim etti, dep habarlaıdy QazAqparat tilshisi.
Almaty qalalyq psıhıkalyq densaýlyq ortalyǵynyń dırektory Sapar Rahmensheevtyń aıtýynsha, osydan birneshe jyl buryn shylymǵa qumar azamat júrek syrqatymen aýrýhanaǵa túsken.
Dárigerler oǵan densaýlyǵyna qaýipti ádetten bas tartpasa, júrek qan tamyrlary aýrýy asqynyp, odan aman qalýy ekitalaı ekenin eskertti.
«Almaty turǵyny 40 jyldan keıin temekige táýeldilikten qutyldy. 8 jyldan beri temekini aýzyna almaıdy. Qazir densaýlyǵy jaqsy. Táýeldilikten arylý ońaı emes. Degenmen, emi bar. Mundaı kezde dári-dármek taǵaıyndaımyz. Ortalyqta turǵyndarǵa psıhologııalyq, psıhoterapııalyq kómek kórsetiledi. Eń bastysy shylymǵa qumar azamattyń «bas tartamyn» degen nıeti bolý kerek. Eger emdelýshiniń temekiden bas tartýǵa nıeti bolmasa, emniń paıdasy bolmaıdy», -deıdi ortalyq dırektory Sapar Rahmensheev.
Sonymen qatar, dáriger temeki men nasybaıdyń quramyndaǵy zııandy zattardyń eshqandaı aıyrmashylyǵy joq ekenin atap ótti.
«Kóbinese kók tútinge táýeldi jandar nasybaıdy tutynyp, shylym shegýden qutyldym dep oılaıdy. Ókinishke qaraı olardyń quramyndaǵy zııandy zattardyń eshqandaı aıyrmashylyǵy joq. Shylym shekkende nıkotın qanǵa ókpe arqyly tarap, aǵzany ýlaıdy. Ókpe tazarady degen málimet jalǵan. Nasybaı atqanda zııandy zattar aýyz qýysynyń qan tamyrlary arqyly qanǵa túsip, aýyz qýysynyń, ókpeniń, asqazannyń qaterli isiginiń paıda bolýy múmkin. Óıtkeni nasybaıdyń quramynda taýyqtyń qıy, áktiń sýy, sekseýildiń kúli, qaraaǵashtyń shaıyry ,temekiniń japyraǵy bar. Nasybaı atqan adam da nıkotınge táýeldilikten zardap shegedi. Qazirgi tańda sánge aınalǵan elektrondy temeki de qaýipti», -deıdi maman.
Shylymqumarlar on jylda temekige 2,7 mln teńge shyǵyndaıdy.
«Temeki shegý aǵzany azdyryp, mı qyzmetin álsiretip, erte qartaıý úderisin jedeldetýge áser etetin ýly tútin. Shylymqorlardyń otbasylyq bıýdjetine ákeletin shyǵyny da qomaqty. Elimizde bir qoraptyń ortasha baǵasy - 750 teńge. Nıkotınge táýeldi adam kúnine bir qorapty taýysyp, aıyna 22500, jylyna 270 000 teńge kók tútinge jumsaıdy. Al on jylda 2,7 mln teńge shyǵyndaıdy»,- dep atap ótti Sapar Rahmensheev.
