Almaty turǵyny 2 myń teńge berip, blok-beketten adam ótkizbek bolǵan – polıtsııa

Bul týraly onlaın brıfıng barysynda qalalyq PD Ákimshilik polıtsııa basqarmasynyń basshysy Jandos Muratalıev aıtty, dep habarlaıdy QazAqparat tilshisi.

«Karantın jarııalanǵan eki kúnde qala halqy arasynda aqsha bergen jaǵdaıda blok-beket arqyly ótýge bolady eken degen aqparat tarady. Osy oraıda biz arnaıy top quryp, azamattardy ótkizýge járdem berip júrgen jolaýshy tasymaldaýshyny ustadyq. Ol azamattarǵa 2000 myń teńge bergen jaǵdaıda beketten ótkizýge ýáde berip, aldanǵan azamattardy beket mańyna ákelip, izin sýytatyn bolǵan. Ózi oblysqa óte almady. Oǵan qatysty qazir alaıaqtyq baby boıynsha qylmystyq is qozǵaldy. Tergeý júrgizilip jatyr», - dedi J.Muratalıev.

Onyń aıtýynsha, qazirgi ýaqytta atalǵan blok-beketterdediń jumys barysy turaqty, kólikter jáne azamattar qalypty tártippen ótkizilip, tártip saqshylary azamattarmen jáne kólik júrgizýshilerimen túsindirý jumystaryn júrgizip jatyr.

Túsindirý jumystary dybys kúsheıtkish quraldary arqyly da júzege asyrylýda.

«Azamattar ózderiniń jeke qaýipsizdigi jaıly, sanıtarlyq talaptardyń saqtalýy, júk kólikteriniń blok beketter arqyly qandaı qujattarmen ótkizilýi jáne jaýapkershiligi jaıly, jáne tótenshe jaǵdaı kezinde zań talaptaryn buzǵan nemese bılik ókilderine baǵynbaǵan jaǵdaıda ákimshilik nemese qylmystyq jaýapqa tartylatyndyqtary týraly, sondaı-aq kez-kelgen zańǵa qaıshy áreketterdi habarlap otyrýlary úshin keri baılanys boıynsha tolyq aqparattar alýda», - dedi ol.