Almaty turǵyndarynan 827 mln. teńgege qarýlar satyp alyndy

Bul týraly búgin Almaty qalalyq ІІD baspasóz qyzmetinen habarlady.

Qazaqstan boıynsha turǵyndardan memleket tarapyna zaqymdaǵysh jáne gaz-zaqymdaǵysh qarýlar satyp alý naýqany ústimizdegi jyly 1 qańtarda bastalǵan bolatyn. Bul týraly turǵyndarǵa buqaralyq aqparat quraldarynda keńinen habardar etildi. Almatyda kúni búginge deıin polıtsııa bólimderine qarýyn tapsyrý úshin 14 740 adam júgingen. Barlyǵy 827 mln. 402 myń 071 teńgege 15 871 qarý satyp alyndy. Qazir esep boıynsha jeke qolda tapsyrylmaǵan 389 qarý qalyp otyr.

«Taǵy da eske salamyz, zaqymdaǵysh qarýlardy tapsyrmaǵan adamdar, 2016 jyldyń 1 qańtarynan bastap, QR Qylmystyq Kodeksiniń 287-shi babynyń 1-shi tarmaǵy boıynsha qylmystyq jaýapkershilikke tartylady. Bul bapta aıyppul salý (eki myń aılyq eseptik kórsetkishke deıin) nemese túzetý jumystaryn atqarý, bir jylǵa deıin bostandyǵyn shekteý nemese bir jylǵa bas bostandyǵynan aıyrý jazalary qarastyrylǵan. Qarýlaryn tapsyrǵan azamattarǵa mynadaı kólemde aqsha tólenedi: birinshi dárejege jatatyn qarýlardyń baǵasynyń 90 paıyzy, ekinshisine jatatyn qrýlardyń baǵasynyń 70 paıyzy jáne úshinshisine jatatyn qarýlardyń baǵasynyń 50 paıyzy tólenedi», - dedi osyǵan oraı Almaty q. ІІD Ákimshilik polıtsııa basqarmasynyń bastyǵy, polıtsııa polkovnıgi Nurlan Almasbekov.

Aıta ketelik, bul naýqan elimizde osy qarýlardy qoldaný arqyly jasalǵan qylmystardyń kóbeıip ketýine baılanysty qolǵa alynǵan bolatyn. Naýqannyń aıaqtalýyna 18 kún qaldy. Rezeńke oqtarmen atatyn zaqymdaǵysh qarýlaryn tapsyrmaǵandar 2016 jyldyń 1 qańtarynan bastap, qylmystyq jaýapkershilikke tartylady. Endi, aldaǵy jyldan bastap ózin-ózi qorǵaýǵa tek gaz patronymen atatyn gaz tapanshalary men elektroshokerlerdi ǵana qoldanýǵa bolady. Biraq bul úshin, árıne ishki ister organdarynyń ruqsaty kerek.