Almaty turǵyndaryna kóshkin qaýpine baılanysty taýly aımaqqa shyqpaýǵa keńes berildi
ASTANA. 1 jeltoqsan. QazAqparat - Almaty qalasy men Almaty oblysynyń taýly aýdandaryna 1-3 jeltoqsan aralyǵynda kóshkin qaýpine baılanysty qar basqan taý bókterlerine barmaýǵa keńes berildi.
Bul týraly búgin «Qazgıdromettiń» eskertýlerine baılanysty uıymdastyrylǵan baspasóz máslıhatynda QR TJM-nyń «Qazseldenqorǵaý» memlekettik mekemesi bastyǵynyń orynbasary Aleksandr Babaıkın málim etti.
«Búginde barlyq taý shatqaldaryna baratyn joldar jabyldy, eskertý belgileri qoıyldy. Bizdiń aqparatymyz boıynsha, erteń qar jaýý toqtalady, sodan keıin komıssııa shyǵyp, adamdarǵa qaýip tóndiretin jerlerdi anyqtaıdy. Máselen, Shymbulaqta aldyn ala kóshkin jasalyp, qar tómenge etekke túsiriledi», - dep qosty A.Babaıkın.
Almatyda 30 qarashadan 1 jeltoqsanǵa deıin qardyń mol jaýýy saldarynan 300-den astam aǵashtar men butaqtar qulady. Onyń ishinde elektr jelileriniń ústine qulaýynyń 50 jaǵdaıy, júrginshi joldaryna qulaǵan - 30 jaǵdaı, avtomobılderdi basyp qalǵan - 15 jaǵdaı, ǵımarattar tóbelerine qulaǵan - 18 derek tirkelgen. Zardap shekkender men qurban bolǵandar joq.
Almaty qalalyq jol polıtsııasy basqarmasynyń málimetteri boıynsha, 31 jol-kólik oqıǵasy tirkelgen, degenmen qurban bolǵandar joq. «Medeýden» Shymbulaqqa qaraı júretin jolǵa jol polıtsııasy beketi qoıyldy.
Qazirde «Almaty tazalyq» memlekettik kommýnaldyq mekemesi 428 jumysshysyn jáne 238 birlik tehnıkany qala aýmaǵynan qardy tazalaýǵa shyǵardy.
Sondaı-aq barlyq basshylar tótenshe jaǵdaılarǵa jol bermeý úshin ǵımarattar men áleýmettik, mádenı jáne oıyn-saýyq sıpatyndaǵy qurylystardyń aýmaǵy men tóbelerin qardan tazartý sharalaryn qolǵa alýy tıis.
Avtomashınalar ıeleri avtomobılderin turaqqa qoıýda qaýipsizdik sharalaryn alyp, ǵımarattar tóbesinen muz, aǵashtardan qar túsýi yqtımal jerlerge avtokólikterdi qoımaýy tıis.
