Almaty turǵyndary jańa ákimge óz usynystaryn áleýmettik jeli arqyly jetkizdi
ALMATY. QazAqparat - Búgin Almaty qalasynyń jańa ákimi Baqytjan Saǵyntaev Instagram, Facebook jáne Twitter áleýmettik jelilerine tirkeldi, dep habarlaıdy QazAqparat tilshisi.
Qala basshysy óziniń áleýmettik jelidegi alǵashqy jazbasyn Almaty qalasynyń turǵyndaryna arnady.
«Qurmetti almatylyqtar! Búgin sizdermen tikeleı baılanysta bolý úshin Facebook, Instagram jáne Twitter akkaýnttaryn ashtym. Sizdermen dıalogqa daıynmyn! », - dep jazdy Baqytjan Saǵyntaev.
Almatylyqtar jańa ákimdi qyzmetimen quttyqtap, óz oılary men usynystaryn jetkizdi.
Jańa ákimge kelip túsken usynystardyń basym bóligi ál-Farabı dańǵylynda ruqsat etilgen saǵatyna 80 shaqyrym jyldamdyqty qaıtarý boldy. Azamattardy qorshaǵan ortany qorǵaý, avtomobıl joldary, qoǵamdyq kólik, qalalyq aýdandardy damytý jáne kommýnaldyq máseleler alańdatady.
Eki saǵat ishinde Baqytjan Saǵyntaevtyń Instagram paraqshasyna turǵyndar 500-ge jýyq pikir qaldyrdy.
Eske salaıyq, 28 maýsymda Memleket basshysynyń Jarlyǵymen Baqytjan Saǵyntaev Almaty qalasynyń ákimi bolyp taǵaıyndaldy.
Avtor: Alma Muqanova
