Almaty turǵyndary sońǵy eki kún ishinde 100 lıtr qan tapsyrdy
ALMATY. QazAqparat-Almatyda lańkestik áreket saldarynan zardap shekkenderge kómek kórsetý maqsatynda qala turǵyndary eki kún ishinde 100 lıtrden astam qan tapsyrdy.
Bul týraly búgin Almatyda brıfıng barysynda Almaty qalalyq Densaýlyq saqtaý basqarmasynyń bas hırýrgi Nurjan Isabekov habarlady.
«Áleýmettik jelilerde lańkestik áreket saldarynan zardap shekkenderge qan jetispeı jatyr degendeı jalǵan aqparattar taratylyp jatyr. Shyn mánisinde qan jetedi. Barlyq zardap shekkenderge tolyqandy keshendi medıtsınalyq kómek kórsetilýde. Keshe erikti túrde 221 adam kelip qan tapsyrsa, búgin kúndizgi saǵat 14:00-degi jaǵdaı boıynsha 219 adam qan tapsyrdy. Olardyń arasynda qala turǵyndary, jastar, stýdentter, dárigerler, quqyq qorǵaý organdarynyń ókilderi jáne áskerıler bar», - dedi Nurjan Isabekov.
Sonymen qatar, onyń aıtýynsha, zardap shekkenderdiń barlyǵy derlik keýde tustarynan, ishten jáne aıaq-qoldarynan jaraqat alǵan.
Sonymen qatar, bas otashy ustalǵan kúdiktiniń Hırýrgııa ǵylymı-zertteý ınstıtýtynan tergeý abaqtasyna aýystyrylǵandyǵyn aıtty.
«Kúdikti tergeý abaqtysyna aýystyryldy. Ol keýde jáne ishinen jaraqat alǵan», - dedi N. Isabekov.
