Almaty turǵyndary moped júrgizýshileriniń áreketine shaǵymdandy
ALMATY. QazAqparat - Almatylyqtar jol erejesin buzǵan moped júrgizýshileriniń ústinen ákimge shaǵymdandy. Aıtýlarynsha, olar jaıaý júrginshiler jolymen qatty jyldamdyqpen qozǵalady, bul óte qaýipti, dep habarlaıdy QazAqparat tilshisi.
«Nege mopedterdiń jaıaý júrginshiler jolymen júrýine tyıym sala almaısyz? Arbatta júrýge bolmaıdy, biraq munda olar bar jyldamdyqpen júredi. Bizdiń baratyn jerimiz joq. Biz olardan jolǵa shyǵýyn suraımyz, alaıda olar mán bermeıdi. Polıtseıler eshteńe istemeıdi», - dedi Bostandyq aýdanynyń turǵyny.
Bul saýalǵa jaýap bergen Almaty ákimi Erbolat Dosaev moped júrgizýshilerin retteý úshin zańnamalyq normalardyń qabyldanýynyń aıaqtalýyn kútý kerek dep jaýap berdi.
«Elektrsamokattardyń qozǵalysy zań júzinde retteldi. Kelesi kezekte mopedshiler tur. Bizde mopedterge, elektrsamokattarǵa jáne jalpy qozǵaltqyshy 50 tekshe metrge deıingi kólikterge qatysty kelesi ózgertýler paketi bar. Olar zań júzinde kólik quraly retinde tanylǵan kezde olarǵa aıyppul salýǵa bolady. Al Arbat boıynda – biz ótýge tolyq tyıym saldyq. Merzimdi túrde Almaly aýdanynda bolǵanymda túnde kólik júrgizedi degen ótinishter túsedi, soǵan oraı shara qoldanamyz. Bul másele barlyǵyn mazalaıdy. Mopedpen negizinen azyq-túlik tasıtyn jumysshylar júretinin bilesizder. Olar jetkizýdi, tapsyrysty oryndaýǵa úlgerý úshin kez kelgen tártipti buzýǵa daıyn», - dedi ákim.
Almaty qalalyq polıtsııa departamentiniń basshysy Arystanǵanı Zapparov moped júrgizýshilerimen profılaktıkalyq jumystar júrgizilip jatqanyn aıtty.
«Biz jetkizý qyzmetimen birlese otyryp, moped júrgizýshilerine shara qoldanýǵa múmkindik beretin arnaıy baǵdarlama ázirledik. Eger bizdiń qyzmetkerler azyq-túlikti jetkizý bóliginde zańbuzýshylyqtardy anyqtasa, atap aıtqanda, 3-ten 5-ke deıin zańbuzýshylyqtar bolsa, baǵdarlama buǵattalady, bul olarǵa yqpal etýdiń bir túri», - dedi Polıtsııa departamentiniń basshysy.
Erbolat Dosaevtyń sózinshe, máseleni sheshýdiń ońtaıly joly – zańdy shekteýler engizý. Kúzge deıin bul másele sheshiledi.
Buǵan deıin Arbat mańynda jınalyp, turǵyndardyń tynyshtyǵyn buzǵan moped júrgizýshileriniń ákimshilik jaýapqa tartylǵany týraly jazǵan edik.
