Almaty turǵyndary Qarshyǵa Ahmedııarovty sońǵy saparǵa shyǵaryp saldy

Qoshtasý kezinde Mádenıet mınıstri Muhtar Qul-Muhammed Elbasy Nursultan Nazarbaevtyń kóńil aıtyp joldaǵan jedelhatyn oqyp berdi. Onda: "Halqymyzdyń aıaýly perzenti, dáýlesker kúıshi ári kompozıtor Qarshyǵa Ahmedııarovtyń ómirden ozǵanyn estip otyrmyn. Qarshyǵa Ahmedııarov marqumnyń otbasy men týǵan-týysqandaryna, asa aýyr qaıǵylaryńyzǵa ortaqtasyp, kóńil aıtamyn. Ol kisiniń halqymyzdyń kıeli kúı ónerin nasıhattaýdaǵy orny da, eńbegi de orasan edi. Kúı qudiretiniń barlyq názik ıirimderin jaıyp salatyn oryndaýshylyq sheberligi árdaıym tyńdaýshysyn qaıran qaldyryp, janyńa erekshe shýaq syılaıtyn. Onyń symbatty tulǵasynda tańǵajaıyp óner men adamgershilik qasıetter qabat qabysyp jatatyn. Eli bar da, halqy bar da, Qarshyǵa Ahmedııarovtyń esimi men eńbegi, qalyptastyrǵan mektebi, qaldyrǵan murasy umytylmaıdy dep senemin. Marqumnyń topyraǵy torqa, jany jannatta bolǵaı. Aldaǵy kúnderińizge amandyq pen jaqsylyqtar tileımin", delingen.

Mádenıet mınıstri Muhtar Qul-Muhammedtiń aıtýynsha, búgin bir áýlettiń, bir otbasynyń, bir mádenıettiń ǵana emes, búkil qazaq halqynyń aýyr qazasy. "Búgin Qarshyǵa Ahmedııarovpen birge qazaqtyń dástúrli kúı óneriniń, tutas bir dáýirin birge shyǵaryp salǵaly otyrmyz. Qazaqtyń myń jyldyq dástúrli kúı ónerin HH-ǵasyrdyń basynda ardaqty Ahmet Jubanov júıelep, qolmen qoıǵandaı, tasqa basqandaı ǵyp qaldyryp edi. Sodan keıingi kezeńde Shamǵon Qajyǵalıev, Nurǵısa Tilendıev sııaqty uly kúıshiler bul ónerdi uly bıikke kóterdi. Qarshyǵa Ahmedııarov sol alyptardyń sońy edi. Ulylardyń ulaǵatyn alǵan ózi de - ulylyq dárejesine kóterilgen, qazaqtyń uly mádenıet qaıratkeri", dep atap ótti Mádenıet mınıstri Muhtar Qul-Muhamed.

Memleket qaıratkeri, kompozıtor, halyq ártisi Erkeǵalı Rahmadıevtiń aıtýynsha, búgin eki ishekti dombyranyń bir ishegi úzilip túsken kún. "Búgin qazaqtyń óneri úshin orny tolmas qaıǵy, ortamyzdan bir juldyz aǵyp tústi. Degenmen, eli bar jerde, talantty jastar bar jerde, óner ortaımas. Baýyrym Qarshyǵa Ahmedııarov tókpe kúıdiń tóresi, shertpe kúıdiń sheberi, qazaq óneriniń tulpary, 50 jyldan artyq qazaq óneriniń jaryq juldyzy bolyp edi. Dáýlesker kúıshiler kóp, biraq Qarshyǵanyń joly basqa», dedi ol.

64 jasynda dúnıeden ozǵan, qazaqtyń qazynasy - qudyretti kúı óneri dúldúlderiniń birine aınalǵan dombyrashynyń jambasy Almatydaǵy Keńsaı zıratynda jerge tımek.