Almaty turǵyndary emen jáne qaraǵashty otap tastaǵandarǵa narazylyq bildirdi
ALMATY. QazAqparat – Almatyda Sulpak saýda úıiniń janyndaǵy jaıqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi, dep habarlaıdy QazAqparat tilshisi.
«Sulpak jáne Small túngi 4.00-te 10 emen aǵashyn zańsyz kesip tastady. Endi olar bul isti jymyn bildirmeı jaýyp tastaǵysy kelip jatyr. Bul oqıǵa 22 qarashada bolǵan», - dedi Instagram -daǵy jazbada. Bul oqıǵaǵa baılanysty ákimdik túsinik berdi.
Olardyń aıtýynsha, Tólebı kóshesindegi 187-úıde ornalasqan ǵımarattyń janyndaǵy taldardy kesýge ruqsat berilmegen.
«Qazir aýdan ákimdigi men Polıtsııa departamenti kesilgen aǵashtardyń tuqymy men sapasyn anyqtaý úshin oqıǵa ornynda jumys istep jatyr. Aıypty tulǵalar anyqtalǵan soń Polıtsııa departamenti olardy jaýapkershilikke tartady. Tolyǵyraq aqparatty anyqtaý jumystary aıaqtalǵan soń jarııalaımyz», - dedi ákimdikten.
