Almaty turaqtarynda 12 myń teńgelik abonement engizildi
ALMATY. QazAqparat - Almaty aqyly turaqtarynda biryńǵaı abonement engizildi. Endi júrgizýshiler jabyq turaqtarda da, trotýar boıyndaǵy turaqtarǵa da aıyna 12 myń teńge tólep kez-kelgen ýaqytta qoıa alady, dep habarlaıdy QazAqparat tilshisi.
«Uzaq taldaýdan soń qala boıynsha biryńǵaı abonement jasaý týraly sheshim qabyldandy. Endi júrgizýshiler kez kelgen jerge 12 myń teńgege kóligin qoıa alady. Al jeńildik alatyn sanattardy bizge Almaty ákimdigi belgilep berdi. Arnaıy tirkeýden soń júrgizýshiler aqy tóleýden bosatylady», - dedi kompanııa dırektory Marat Pirinbekov.
M.Pirinbekov qala turǵyndary tarapynan kóptegen narazylyq týyp otyrǵanyn da aıtty.
«Aqyly turaqy bar aýdandarda turǵyndar kólik qoıa almaı qaldy. Olardyń kópshiligimen túsindirý jumystary júrgizildi. Endi turǵyndar aıyna 1 myń teńge tólep, rezıdenttik kelisimge otyrady. Sonda 6 aıda turǵyndar 6 myń teńge tólep, kólikterin turaqqa qoıa alady», - dedi ol.
Ol úshin turǵyndar «Almaty SpetsTehParkıngServıs» JShS keńsesine kelip, rezıdenttik kelisimge qol qoıýy kerek.
Onyń aıtýynsha, bıyl bir aıǵa tólegende kóshe boıyndaǵy turaq ornynyń baǵasy 18 myńnan 12 myńǵa tómendegen.
Sonymen qatar, bıyldan bastap parkomattar artyq aqshany qaıtaratyn bolady.
«Parkomattardyń artyq tólemdi qaıtarmaıtyny problema. Bul týraly narazylyqtar óte kóp. Biraq parkomat bankomat emes. Áıtpese, vandalızm bar, ońaı oljaǵa kenelgisi keletinder de az emes. Buryn parkomattar tek tıyn qabyldaıtyn. Endi apparattar qaǵaz aqsha da alatyn boldy. Jaqynda parkomattar tólengen artyq aqshany mobıldi telefonǵa qaıtaratyn bolady. Ol úshin júrgizýshiler mobıldi qosymshany júkteýi tıis», - dedi Marat Pirinbekov.
