Almaty túngi velosherýge daıyndalyp jatyr
ALMATY. QazAqparat - «Sporttyq Almaty» jobasy aıasynda megapolıste ekinshi túngi velosherý ótetin kún belgili boldy, dep habarlaıdy QazAqparat tilshisi.
Ekinshi túngi velosherý 22 shilde kúni ótedi, sol kúni 20:30-da áýesqoılar «Nurly Taý» bıznes ortalyǵy mańynda jınalyp, baǵaly syılyqtar oınatylatyn lotereıaǵa qatysýǵa múmkindik beretin nómirler alady. Al 21:00-de velosherý qatysýshylary Ál-Farabı men Jeltoqsan kósheleriniń qıylysynan bastap, tuńǵysh Prezıdenti saıabaǵyna deıin júretin bolady. Jalpy veloshabandozdar 9 shaqyrym qashyqtyqty baǵyndyrady.
Márede qatysýshylar arasynda baǵaly syılyqtar oınatylyp, ádettegideı, sportshylardyń biri basty syı, velosıpedti utyp alady.
Aıta ketsek, osy velosherý «Sporttyq Almaty» qalalyq baǵdarlamasynyń qoldaýymen 2017-shi jyly josparlanǵan 21 velosherýdiń on úshinshisi bolmaq.
Eske sala keteıik, birinshi túngi velosherýge 3 myńǵa jýyq almatylyq qatysty. Velsherý kúni joldar jartylaı jabylady.
