Almaty tragedııasy: Nur-Cultannan 360 doza qan jetkizilgen

NUR-SULTAN. QazAqparat – Eldegi Tótenshe jaǵdaı rejımi kezinde medıtsınalyq avıatsııa rezerv úshin Nur-Sultannan Almatydaǵy qan ortalyǵyna 360 doza qan jetkizgen. QR Densaýlyq saqtaý mınıstrligi qoǵammen baılanys departamentiniń dırektory Ásel Artakshınova Ortalyq kommýnıkatsııalar qyzmetinde ótken brıfıngide osyndaı málimet keltirdi, dep habarlaıdy QazAqparat tilshisi.

«Densaýlyq saqtaý mınıstrliginiń qurylǵan jedel shtaby óńirlermen birge barlyq zardap shekkenderge úzdiksiz medıtsınalyq kómek kórsetýdi qamtamasyz etti. Konsýltatıvtik jáne praktıkalyq kómek kórsetý úshin barlyq respýblıkalyq jetekshi klınıkalar qosyldy.

Іshki ister mınıstrligimen birlesip Almaty, Nur-Sultan, Shymkent, Aqtóbe qalalarynda «SQ Farmatsııa» dárilik qoımalaryn táýlik boıy kúzetý qamtamasyz etildi. Onda tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý sheńberinde patsıentterdi emdeýge arnalǵan barlyq dári-dármekter, sonyń ishinde esirtki jáne psıhotroptyq zattar saqtalady», - dedi mınıstrlik ókili.

Onyń sózine qaraǵanda, medıtsınalyq avıatsııa qyzmeti de bul kezeńde jumysyn qaltqysyz oryndaǵan.

«Medıtsınalyq avıatsııa rezervti qurý úshin Nur-Sultan qalasynan Almaty qalasyna qan ortalyǵyna 360 doza qan jetkizdi. Medıtsınalyq uıymdar dárilik preparattarmen jáne qan komponentterimen tolyq kólemde qamtyldy», - dedi Ásel Artakshınova.