Almaty tragedııasy: Qala ortalyǵyna bir mezgilde 20 myń adam jınalǵan

NUR-SULTAN. QazAqparat – 5 qańtar kúni tańerteń Almatyda qala ortalyǵyna bir mezgilde 20 myń adam jınaldy. Bul týraly búgin Ortalyq kommýnıkatsııalar qyzmetinde Almaty qalalyq Polıtsııa departamentiniń bastyǵy Qanat Taımerdenov málim etti, dep habarlaıdy QazAqparat tilshisi.

«Qańtardyń 5-i kúni tańǵa deıin qala polıtsııasy men Ulttyq ulannyń kúshimen barlyq barıkadalar tolyǵymen joıylyp, joldardy jaýyp turǵan kólikter shyǵaryldy. Qalada tártip ornady. Sonymen qatar, 5 qańtar kúni tańerteń ár aýdan men men shet aımaqtardan qala ortalyǵyna bir mezgilde 20 myń adam jınaldy. Olardyń júrip ótýine jol bermeý úshin Tóle bı, Nazarbaev, Saın, Raıymbek, Seıfýllın kóshelerinde qorshaýlar qoıyldy. Sandyq artyqshylyq pen qarýdy paıdalana otyryp, qyzmetkerlerdiń janqııarlyq áreketterine jáne qoldanǵan arnaıy tehnıkaǵa qaramastan, olar birneshe qorǵanys shebin buzyp ótip, polıtseılerge dene jaraqatyn salyp, kólikterge zaqym keltirdi», - dedi Qanat Taımerdenov.

Onyń aıtýynsha, odan keıin Respýblıka alańyna jınalǵan myńdaǵan shabýylshylar ákimdik ǵımaratyn basyp alýǵa árekettendi.

Budan buryn habarlanǵandaı, polıtsııa departamentiniń basshysy Almatyda lańkester 1347 qarý urlaǵanyn aıtty.