Almaty Towers-tegi órt: Prokýror Batýt ortalyǵynyń dırektoryn 5 jylǵa bas bostandyǵynan aıyrýdy surady
ALMATY. QazAqparat - Búgin Almatyda №2 Bostandyq aýdandyq sotynda qaıta tergeýge berilgen Almaty Towers ǵımaratyndaǵy órtke baılanysty iste taraptar jaryssózge shyqty, dep habarlaıdy QazAqparat tilshisi.
Prokýror Batýt ortalyǵynyń dırektory Dáýren Tuıaqov pen dánekerleýshi Aleksandr Jýk úshin qandaı jaza taǵaıyndaýdy talap etetinin jetkizdi.
«Sottalýshy Dáýren Tuıaqov pen Aleksandr Jýk QR QK 292- babynyń 3-bólimi boıynsha órt qaýipsizdigin saqtamady degen aıyp taǵylǵan bolatyn. Sot tergeýi barysynda ekeýiniń de kinási dáleldendi. Tuıaqov Batýt ortalyǵynyń dırektory retinde ǵımaratty jalǵa alý týraly kelisimge qol qoıǵan. Kelisimde barlyq órt qaýipsizdigi talaptary týraly jazylǵan. Tuıaqov áreketsizdik tanytyp, jumysshylarymen ınstrýktaj júrgizbegen. Órt qaýipsizdigi sharalary qoldanylmaǵan. Sonyń saldarynan 6 adam ajal qushty. Dánekerleýshi Aleksandr Jýk dánekerleý kezinde jumys ornyn tazalamaǵan. Ekeýiniń de jazasyn jeńildetetin jaıttardy eskere kele Dáýren Tuıaqovty 5 jylǵa bas bostandyǵynan, Aleksandr Jýkty da 5 jylǵa bas bostandyǵynan aıyrýdy suraımyn», - dedi memlekettik aıyptaýshy.
Aıta ketý kerek, qaıǵyly jaǵdaı 2016 jyldyń 6 qarashasynda bolǵan edi. Almaty Towers ǵımaratynda tutanǵan órt 6 adamnyń ómirin jalmady. Onyń ishinde dánekerleýshi Nazır Nııazov pen 5 stýdent ystan ýlanyp óldi. Keıinirek tiri qalǵandardyń biri sotta syrtqa shyǵatyn esiktiń jabyq turǵanyn aıtyp edi. Osyǵan baılanysty «Jump» batýt ortalyǵynyń dırektory Dáýren Tuıaqov ustaldy. Oǵan QR QK 292-babynyń 3-bólimi boıynsha órt qaýipsizdigin saqtamady degen aıyp taǵylǵan edi. Birneshe aıǵa sozylǵan sot talqylaýynan soń sýdıa isti qaıta tergeýge jibergen bolatyn. Qaıta tergeý jumystarynan soń kýágerlerdiń biri - oqıǵa ornynan aman shyqqan dánekerleýshi Aleksandr Jýk Tuıaqovpen birge sottalýshyǵa aınaldy.
Aldyńǵy sotta sottalýshy Aleksandr Jýk túsinikteme berdi. Almaty Towers ǵımaratyndaǵy batýt ortalyǵynda dánekerleý jumystary úshin ýaqytsha jaldanǵan jumysshy sol kúni ne bolǵanyn aıtyp ótti.
