Almaty Towers-tegi órt: Qorǵaýshy Tuıaqovty aıyptaý babyn ózgertýdi surady
ALMATY. QazAqparat - Qorǵaýshy Djohar Ótebekov Batýt ortalyǵynyń dırektory Dáýren Tuıaqovty aıyptaý babyn ózgertýdi surady, dep habarlaıdy QazAqparat tilshisi.
Onyń aıtýynsha, sottalýshy Dáýren Tuıaqovqa QR QK 292-babynyń 2-bólimi boıynsha taǵylǵan aıyp boıynsha qylmystyq quram joq.
«Batýt ortalyǵynda jas balalar 1 rettik qana qyzmet kórsetýmen aınalysqan. Ýaqytsha jumys bolǵandyqtan, olarmen eńbek qatynasy bolmaǵan. Eshqandaı kelisimshart jasalmaǵan. Sol balalardyń bárine ınstrýktaj jasaýǵa Tuıaqov mindetti bolmaǵan. Bul aqylǵa syımaıdy. Sonymen qatar tergeý barysynda Tuıaqov apattyq esikti kilttep qoıdy degen aıypqa da eshqandaı dálel tabylǵan joq. Sonymen qatar, memlekettik aıyptaýshy basynda bizge 5 adamnyń ólimin japqan. Endi qazir 6 adamnyń ólimi bizge tańylyp otyr. Sondaı-aq, órt qaýipsizdigi týraly ereje kóbinese qurylys montaj jumystaryna baılanysty aıtylady. Al, Batýt ortalyǵyndaǵy dánekerleý jumystary qurylys jumystaryna jatpaıdy. Sondyqtan bul aıyptaý negizsiz. Meniń oıymsha, bul eń aldymen atalǵan ǵımarattyń ıeleri, qurylysshylar, órtke qarsy qyzmettiń jumysynyń álsizdigin kórsetedi», - dedi Djohar Ótebekov.
Óz kezeginde Dáýren Tuıaqovtyń qorǵaýshysy Djohar Ótebekov zań aldynda adam ólimi úshin basqa da tulǵalar jaýap berýi tıis bolǵanyn aıtty.
Onyń aıtýynsha, qalalyq TJD Almaty Towers ǵımaratyna 7 jylda birde bir ret tekserý jasamaǵan.
«Tuıaqov QR QK 292-baby boıynsha qylmys jasamady. Onyń áreketin QR QK 104 babyna (abaısyzda adam óltirip alý) aýystyrǵan jón. 1 jyldan beri Tuıaqov balalaryn, otbasyn kórgen joq. Sonymen qatar, ol barlyq japa shekken adamdardyń otbasylaryna materıaldyq shyǵyndaryn shamasy kelgenshe japty. Keshirim surady», - dedi D.Ótebekov.
Atalǵan is boıynsha Aleksandr Jýktyń da qorǵaýshylary sot tergeýin jasaýǵa múmkindik bergeni úshin sotqa alǵys bildirdi.
Óz kezeginde Gúljan Jýasbaeva qaıǵyly jaǵdaı úshin ǵımarat qojaıyndary da jaýap berýi tıis dep sanaıdy.
«Ǵımaratta tútin shyǵatyn qubyr bolmaǵan. Arnaıy qubyrlardan sý aqpaǵan. Dabyl, radıo sıgnal bolmaǵan. Kóptegen kýálardyń aıtýynsha, órt sóndirýshiler apatty esikti ashpaǵan. Eń aldymen olar ǵımaratty barlap shyǵýy tıis bolǵan. Olardyń salǵyrttyǵy men tájirıbesizdiginiń kesirinen adamdar sol jerde tańǵa deıin jatyp, kóz jumdy. Qarapaıym, saýatsyz, 19 jasynda árip tanyǵan dánekerleýshi Aleksandr Jýkty tergeýshiler aıypty moınyńa alsań, raqymshylyqqa ushyraısyń dep aldap jibergen. Sondyqtan, meniń qorǵaýymdaǵy Aleksandr Jýkty bosatýyńyzdy suraımyn», - dedi G.Jýasbaeva.
Atalǵan is boıynsha sońǵy sóz 12 naýryzǵa túski 14:00-ge belgilendi.
Aıta ketý kerek, qaıǵyly jaǵdaı 2016 jyldyń 6 qarashasynda bolǵan edi. Almaty Towers ǵımaratynda tutanǵan órt 6 adamnyń ómirin jalmady. Onyń ishinde dánekerleýshi Nazır Nııazov pen 5 stýdent ystan ýlanyp óldi. Keıinirek tiri qalǵandardyń biri sotta syrtqa shyǵatyn esiktiń jabyq turǵanyn aıtyp edi. Osyǵan baılanysty «Jump» batýt ortalyǵynyń dırektory Dáýren Tuıaqov ustaldy. Oǵan QR QK 292-babynyń 3-bólimi boıynsha órt qaýipsizdigin saqtamady degen aıyp taǵylǵan edi. Birneshe aıǵa sozylǵan sot talqylaýynan soń sýdıa isti qaıta tergeýge jibergen bolatyn. Qaıta tergeý jumystarynan soń kýágerlerdiń biri - oqıǵa ornynan aman shyqqan dánekerleýshi Aleksandr Jýk Tuıaqovpen birge sottalýshyǵa aınaldy.
Aldyńǵy sotta sottalýshy Aleksandr Jýk túsinikteme berdi. Almaty Towers ǵımaratyndaǵy batýt ortalyǵynda dánekerleý jumystary úshin ýaqytsha jaldanǵan jumysshy sol kúni ne bolǵanyn aıtyp bergen bolatyn.
