Almaty Towers-tegi órt: Aman qalǵan dánekerleýshi oqıǵanyń qalaı bolǵanyn aıtty
ALMATY. QazAqparat - Búgin Almatyda №2 Bostandyq aýdandyq sotynda qaıta tergeýge berilgen Almaty Towers ǵımaratyndaǵy órtke baılanysty is boıynsha sot jalǵasty, dep habarlaıdy QazAqparat tilshisi.
Osydan birneshe aı buryn sýdıa Roman Selıtskıı órtke kináli tulǵalardyń anyqtalmaýyna baılanysty sotqa qaıta jiberilgen bolatyn.
Búgin sottalýshy Aleksandr Jýk túsinikteme berdi.
Almaty Towers ǵımaratyndaǵy batýt ortalyǵynda dánekerleý jumystary úshin ýaqytsha jaldanǵan jumysshy sol kúni ne bolǵanyn aıtyp berdi.
«Jeksenbi kúni jumysqa keldim. Nııazov Nazır batýttyń buryshtaryn dánekerleý kerek dedi. 4*2 kólemdi kishkentaı qubyrdy dánekerlep bolǵan soń artyma qarasam battýtaǵy paralon janyp jatyr. Órt dep aıǵaıladym da, tımegen paralondardy aıaǵymmen tebe bastadym. Sol kezde qabyrǵada jınalyp turǵan basqa da paralondar shashylyp, jalyn lap etti. Oqıǵa ornynda bolǵan Nııazov degen dánekerleýshi órt sóndirý ballonyn julqylap qosa almaı qoıdy. Sodan amalymyz taýsylǵan soń shyqtyq. Bárine ǵımarattan shyǵyńdar dep aıqaıladyq. Sóıtip, ortadaǵy tereze arqyly birimizden soń birimiz sekirip tústik. Nııazov Nazır sol kezde tunshyǵa bastady. Ol astmatık edi. Áýpirimdep dalaǵa shyqqanda, Nııazov talyp jatty. Tez dáriger shaqyrttyq. Bizben birge taǵy 2 stýdent júgirip shyqqan edi», - dedi Aleksandr Jýk.
Óz kezeginde Aleksandr Jýk ózine taǵylǵan aıyppen kelispeıtinin aıtty.
«Men QR QK 292-baby boıynsha taǵylǵan aıyppen kelispeımin. Sebebi, maǵan tergeýshiler tobynyń jetekshisi Saltanat Hıshanlo órt sebebi dánekerleý jumysynan boldy dep moıyndasańyz, jaqynda bolatyn amnıstııaǵa ilinip shyǵyp ketesiz degen usynys berdi. Men oılanyp-oılanyp kelistim. Oılanyp qarasam, ol jerde órt tutanýy múmkin birneshe faktor bar eken. Bireý temeki shegýi múmkin nemese toq qýatyn tasymaldaıtyn rozetkalardan da tutanýy yqtımal. Onyń ústine órt oshaǵy men jumys istegen jerden 2,5-3 metr qashyqta bolǵan. Men barlyq hattamany oqymaı qol qoıa berdim. Tergeýshilerdiń adamgershiligine sendim. Keıin aıyptaý aktisin oqyǵan kezde barlyq ólgenderdiń ólimine men kináli bolyp shyqqanymdy oqyp, shoshyndym», - dedi Aleksandr Jýk.
Sonymen qatar, tergeýshiler 22 qarashada Aleksandrǵa qorǵaýshydan bas tartýǵa usynys bildirgen.
«Advokattan bas tartyńyz, siz sotqa kerek adam emessiz dedi», - dedi ol.
Sottalýshy Jýk stýdentter shyǵatyn joldy bilmegen soń tunshyǵyp óldi dep sanaıdy.
«Stýdentterde órtten qutylýǵa ýaqyt kóp boldy. Ne úshin olar bizdiń artymyzdan ermedi? Áli kúnge jumbaq. Men shynymdy aıtsam, balalardyń bári shyǵyp ketti degen senimde boldym. Keıin estigendeı, olar jabyq esikke baryp tirelip, sol jerde ystan ýlanyp ólgen eken», - dedi A.Jýk.
Dánekerleýshi jigit ózine jumysqa kirispes buryn eshkim órte qarsy ınstrýktaj júrgizbegenin aıtty.
Aıta ketý kerek, qaıǵyly jaǵdaı 2016 jyldyń 6 qarashasynda bolǵan edi. Almaty Towers ǵımaratynda tutanǵan órt 6 adamnyń ómirin jalmady. Onyń ishinde dánekerleýshi Nazır Nııazov pen 5 stýdent ystan ýlanyp óldi.
Keıinirek tiri qalǵandardyń biri sotta syrtqa shyǵatyn esiktiń jabyq turǵanyn aıtyp edi.
Osyǵan baılanysty "Jump" batýt ortalyǵynyń dırektory Dáýren Tuıaqov ustaldy.
Oǵan QR QK 292-babynyń 3-bólimi boıynsha órt qaýipsizdigin saqtamady degen aıyp taǵylǵan edi.
Birneshe aıǵa sozylǵan sot talqylaýynan soń sýdıa isti qaıta tergeýge jibergen bolatyn.
Qaıta tergeý jumystarynan soń kýágerlerdiń biri - oqıǵa ornynan aman shyqqan dánekerleýshi Aleksandr Jýk Tuıaqovpen birge sottalýshyǵa aınaldy.
