Almaty Towers-tegi órt: Advokat dabyl belgisiniń joqtyǵy adam ólimine sebep bolǵanyn aıtty
ALMATY. QazAqparat - «Almaty Towers» bıznes ortalyǵynda bolǵan órtten japa shekkenderdiń quqyqtaryn qorǵaýshy avdokat Erlan Bekbolov adamdardyń ólimine sebep bolǵan oqıǵanyń beınetúsirilimin jýrnalısterge kórsetti, dep habarlaıdy QazAqparat tilshisi.
Advokat qaıtys bolǵan 3 stýdenttiń quqyǵyn qorǵap sóz sóıledi.
«Myna beınetúsirilimge qarasaq, órt qaýipsizdigi júıesi jumys istemeıdi. Bul vıdeo aldynda berilgen aqparatty teriske shyǵaryp otyr. Birinshiden, Almaty TJD-nyń, ekinshiden ǵımaratty jalǵa alýshylardyń aqparatyn joqqa shyǵarady. Munda eshqandaı da órt qaýipsizdigi júıesi jumys istemeıdi. Bizdińshe, bul órttiń sóndirilmeýine birden bir sebep. Tergeýshilerdiń nusqasy boıynsha, bul vıdeo boıynsha kináli bir ǵana adam bar, ol batýt ortalyǵynyń dırektory», -dedi Erlan Bekbolov baspasóz máslıhatynda.
Onyń aıtýynsha, órt shyǵa qalǵan jaǵdaıda dabyl dybysy iske qosylýy qajet bolǵan.
«Eger dabyl belgisi iske qosylǵanda stýdentterde aman qalýǵa múmkindik bolar ma edi. Dabyl belgisi olardyń erterek qamdanýyna sebep bolar edi», - dedi adovkat.
Advokat tergeý amaldary aıaqtalýǵa jaqyn qalǵanyn aıtty. Ol sózinde qadaǵalaý organdary da jaýapkershilikke tartylýy kerektigin aıtty.
Eske sala ketsek, bıznes-ortalyqtyń otqa oranǵandyǵy týraly aqparat 6 qarashada saǵat keshki jetide túsken. Órtti sóndirý kezinde 80 adam evakýatsııalandy. Jalyn sharpyǵan aımaq 1800 sharshy metrdi qurady. Sonyń saldarynan bir adam mert boldy. Kelesi kúni úıindi astynan taǵy da bes adamnyń múrdesi tabylǵan. Olar almatylyq joǵary oqý oryndarynyń stýdentteri bolyp shyqty.
Osyǵan baılanysty, AlmatyTowers bıznes-ortalyǵyndaǵy «Batýt ortalyǵy» JShS dırektory Dáýren Tuıaqov 2016 jyldyń 15 qarashasynda tutqyndaldy.
«Bostandyq aýdandyq soty QR QK 292-baby, 3-bóliginde kórsetilgen qylmysty jasaýda kúdikti Dáýren Tuıaqovqa qatysty eki aıǵa qamaý túrindegi bultartpaý sharasyn qoldaný týraly qaýly shyǵardy», - dep habarlaǵan bolatyn mekeme.
