Almaty taýynda qar kóshkini Shymbulaq-Tuıyqsý jolyn jaýyp qaldy
ALMATY. QazAqparat - Almaty taýynda qar kóshkini Shymbulaq-Tuıyqsý jolyn jaýyp qaldy, dep habarlaıdy QazAqparat tilshisi.
«Qazseldenqorǵaý» memlekettik mekemesiniń habarlaýynsha, tótenshe jaǵdaı Kishi Almaty ózen alabyndaǵy № 17 «Edelveıs» qar kóshkini jınaǵyshynda bolǵan.
Kólemi 500 tekshe metr bolatyn qar massasy «Shymbulaq - Tuıyqsý» avtojolyn jaýyp qalǵan. Tótenshe jaǵdaıdan zardap shekkender joq.
Apat saldaryn joıýǵa 1 KaMAZ, 1 frontaldy tıegish, 6 adam jumyldyryldy.
Aıta ketý kerek, 30 jeltoqsannan beri «Shymbulaq» BK baqylaýshylary taýda 5 ret qar kóshkenin baqylaǵan.
Kóshkinderdiń eshqaısysy ózenge jetken joq. Kóshkinniń jalpy kólemi 2800 tekshe metrdi quraǵan. Zardap shekkender joq.
30 jeltoqsanda Almaty qalasynyń TJD jáne «Qazseldenqorǵaý» MM mamandary Kishi jáne Úlken Almaty ózenderi alabynda bıik taýly muzdyq kólderge jáne muzdyqtarǵa, qar kóshkini qaýpi bar jerlerge, seldik jáne qar kóshkini qaýpi bar aımaqtardy tekserý úshin aerosholý júrgizilgen bolatyn.
Mamandardyń aıtýynsha, barlyq muz kólder qysqy rejimde jáne qar jamylǵysynyń astynda jatyr. Meteorologııalyq jaǵdaıdyń ózgerýine baılanysty, taý betkeılerinde qar qorynyń az bolýynan jeke aımaqtarda qar kóshkininiń bolýy múmkin. Sondaı-aq, jabaıy ańdardyń, shańǵyshylardyń, ekstremaldy sport túrlerimen aınalysatyn snoýbordısterdiń qar qalyń jınalǵan jerlerde júrýi saldarynan qar kóshkinderi júrýi múmkin.
