Almaty taýynda er adamdy jylan shaqty
ALMATY. QazAqparat - Almatyda jylan shaqqan týrıst qutqaryldy, dep habarlaıdy QazAqparat tilshisi QR TJM baspasóz qyzmetine silteme jasap.
Ótken demalysta Soltústik Talǵar shatqalynan Býtakovka shatqalyna bet burǵan bir top týrıstiń ishinen bir er adamnyń qolyn jylan shaǵyp alǵan. Jigittiń qoly isine bastaǵan. Qasyndaǵylar shuǵyl túrde respýblıkalyq jedel qutqarý jasaǵyn shaqyrǵan.
Oqıǵa ornyna shuǵyl jetken mamandar jigitti dárigerlerge jetkizdi.
QR TJM TJK mamandary jylan shaqqan jaǵdaıda qandaı áreket etý kerektigin túsindirdi.
«Taýda jalań aıaq nemese jeńil aıaq kıimmen júrýge bolmaıdy. Tek qana soqpaqpen, aıaqtyń astyna qarap júrý kerek. Qarańǵy jerge qol suqpaý kerek. Eger sizdi jylan shaqsa, antıgıstamındi dáriniń (sýprastın, tavegıl) dozasyn qabyldap, jylan ýyty tıgen jerdi qozǵaltpaýǵa tyrysý kerek. Esh jaǵdaıda alkogoldi ishimdik ishpeý kerek. sebebi, ishimdik jylan ýynyń aǵzaǵa odan ári taraýyna ákeledi», - dedi ol.
